Выльторъяс

Коми Республикаса Каналан Сӧветлы 20 во

Коми Республикаса Каналан Сӧветлы тырис 20 во. 1995 вося урасьӧм тӧлысь 6 лунӧ муніс выль оланпас пыртан органлӧн, коді вежис КР Медвылыс Сӧветӧс, сессиялӧн медводдза заседание. Тайӧ артмис странаса политика тэчасын вежсьӧмъяс вӧсна, российскӧй канмулысь выль Оланподув вынсьӧдӧм понда.

Республикаса канму власьтлысь выль орган котыртӧм лоис демократия да инӧд сӧвмӧдӧмлӧн историяын тӧдчанаторйӧн, выль тшупӧд вылӧ кайис оланпас пыртан удж да сетіс позянлун вынсьӧдны зэв тӧдчана политическӧй, экономическӧй да социальнӧй решениеяс.

Кызь воӧн вежсис Каналан Сӧветлӧн депутат лыд да найӧс бӧръян ног, но важ ног йӧзӧн бӧрйӧмаяс кӧсйӧны отсавны войтырлы да разьны налысь мытшӧдъяс. Ставнас дінмуса парламентлӧн вӧлі 153 заседание, кӧні вынсьӧдісны куим сюрсысь унджык оланпас да пӧшти сы мында жӧ шуӧм.

Коми Республикаса Каналан Сӧветӧс чолӧмалӧны странаса оланпас пыртан органъяс. Парламентарийяс пасйӧны Коми Республикаысь уджъёртъяслысь вылыс профессионализм, водзмӧстчӧм да кывкутӧм.

«20 во – ӧнія демократическӧй оланпастэчас лӧсьӧдӧмын неыджыд кадколаст. Но тайӧ кадколастӧ Каналан Сӧвет вӧчис зэв ыджыд удж да ёна бурмӧдіс дінму сӧвмӧдӧм могысь нормативнӧй инӧда база. Опыт да уна вося традицияяс вылӧ мыджсьӧмӧн ті водзӧ бурмӧданныд оланпастэчас, ладмӧданныд дінмуса да федеральнӧй инӧда актъяс да збыльмӧданныд тӧдчана могъяс», – гижӧ чолӧмалӧмын РФ Каналан Думаӧн Веськӧдлысь Сергей Нарышкин.