Выльторъяс

Коми Каналан Сӧвет йӧзӧдӧ соцсетьӧ «Закон в деталях» проект

Коми Республикаса Каналан Сӧвет «ВКонтакте» (vk.com/pressgsrk) социальнӧй везйын аслас листбок вылын йӧзӧдӧ «Закон в деталях» проект. Гижӧдчысьяслы вӧзйӧны юксьыны парламентарийяскӧд вынсьӧдӧм оланпасъяс збыльмӧдӧм, налӧн бурлун кузя видзӧдласӧн.

«Миянлы век колӧ тӧдны республикаса олысьяслысь видзӧдлас. Ме серти, социальнӧй везъяс та вылӧ ёна лӧсялӧны. Колӧ, медым граждана, кодъяслы вынсьӧдӧны тайӧ оланпасъяссӧ, юксисны оланпасъяслӧн уджалӧм кузя видзӧдласӧн, да мый колӧ сэні бурмӧдны. Гижӧдчысьяслӧн вӧзйӧмъяс серти кутасны дасьтыны оланпастэчасӧ стӧчмӧдӧмъяс», – пасйис КР Каналан Сӧветӧн Веськӧдлысь Игорь Ковзель.

Сійӧ нӧшта тӧдчӧдіс, мый тайӧ абу ӧтчыдъятор, кутасны и водзӧ вӧзйыны видлавны оланпасъяс.

Проект заводитчӧ «Коми Республика мутасын кода прӧдукция торйӧн вузалӧм содтӧд дзескӧдӧм йылысь» 60-РЗ №-а оланпассянь. Документ серти оз позь торйӧн вузавны слабоалкогольнӧй тонизирующӧй юанторъяс. Но оланпас улӧ оз веськавны ресторанъясын, баръясын да ӧтув йӧзӧс верданінъясын «энергетикъяс» вузалӧм.

«Энергетикъяс» вузалӧм кузя мытшӧд эм. Та йылысь тшӧкыда сёрнитам удж кузя муниципалитетъясӧ ветлігӧн, торйӧн нин ёна тайӧ майшӧдлӧ водзмӧстчысь том йӧзӧс. Та могысь ми вӧзъям вочавидзны Каналан Сӧветлӧн социальнӧй везйын листбок вылын, мый оз тырмы оланпасын да мый колӧ вӧчны, медым эз вузавны татшӧмкодь юанторъяс», – пасйис Игорь Ковзель.