Выльторъяс
Александр Макаренко да Валерий Жилин видлалісны Удораса олысьяскӧд Коми Юралысьлысь тыръюӧр да восьтісны Патриотизмлы сиӧм во
Коми Республикаса Каналан Сӧветӧн Веськӧдлысьӧс вежысь Александр Макаренко да РФ Федерацияса Сӧветӧ пырысь Валерий Жилин в удж кузя ветлісны Удора районӧ да видлалісны Республикаса Юралысь Вячеслав Гайзерлӧн тыръюӧрлысь медшӧр положениеяс, а сідзжӧ кывзісны район да республика сӧвмӧдӧм кузя меставывса зільысьяслысь вӧзйӧмъяс.
«Вячеслав Гайзер висьталіс, мый медшӧрнас лоасны социальнӧй мынтӧмъяс, – став социальнӧй мынтӧмсӧ кутасны вештыны. Та вӧсна оз ков майшасьны. Дерт, талунъя серпасыс абу ёна бур, но республика вермас збыльмӧдны ас кӧсйысьӧмъяссӧ. Нӧшта помӧдз стрӧитасны став помалана объект», - тӧдчӧдіс Александр Макаренко.
Вице-спикер висьталіс и Ёдвасянь Вожӧдз туй дзоньталӧм йылысь. 2015 воын дзоньталасны 48 километрысь 13 километр, тані вежасны став ва лэдзан трубаяс да дзоньталасны посъяс. Бур туйті кутасны ветлыны автобусъяс да районӧ локтасны инвесторъяс да бизнесӧс петкӧдлысьяс.
Дінмуса Юралысьлысь тыръюӧр видлалігӧн водзмӧстчысь йӧз кыпӧдлісны ЖКХ кузя юалӧмъяс, норасисны веськӧдлан компанияяслӧн шогмытӧм удж вылӧ. Сёрнитӧм бӧрын шуисны рака тӧлысьын нуӧдны Усогорскын ЖКХ кузя комиссиялысь заседание, сійӧн юрнуӧдӧ Александр Макаренко.
«Уна муниципалитетын норасьӧны веськӧдлан компанияяс вылӧ. Тшӧкыда овлӧ сідз, мый найӧ оз кывны ас удж йылысь йӧзлысь видзӧдлассӧ. Талун веськӧдлан компанияяс босьтӧны лицензия. Та бӧрын найӧ оз нин вермыны бокӧ кольны норасьӧмъяс, ӧд вермасны воштыны лицензиясӧ. Эска, мый тайӧ отсалас бурмӧдны коммунальщикъяслысь уджсӧ», – пасйис Валерий Жилин.
Нӧшта юасисны Усогорскса школалысь важ корпусын спорт жыр дзоньталӧм йылысь. Спортзалын занятиеяс дырйи +8 градусысь шоныдджык оз овлы. Бать-мам асьныс дзоньталӧны, нуӧдӧны челядь вӧчӧмторъяслысь ярмангаяс, медым нажӧвитны сьӧм, но сійӧ оз тырмы. Александр Макаренко ошкис водзмӧстчысь йӧзӧс, кодъяс корсьӧны сьӧм да кӧсйысис отсавны.
Александр Макаренко да Валерий Жилин восьтісны муниципалитетын Патриотизмлы сиӧм во. Мероприятиеяс пиын ӧтиӧн лоис «Лучшие юноармейские отряды – Великой Победе» смотр-конкурс.
«2015 во республикаын сиисны патриотизмлы. Ті тӧданныд, мый Россия дасьтысьӧ пасйыны Айму вӧсна Ыджыд тышын вермӧмсянь 70 во. Война пырис быд семьяӧ. Миянлы колӧ гӧрдитчыны прадедъяслӧн подвигӧн да некор на йылысь не вудны», – висьталіс Александр Макаренко.
Ордйысьӧмъяс бӧрын гӧсьтъяс сетісны команда-участницаяслы дипломъяс да призъяс.
