Коми Республикаса Каналан Сӧветлӧн вӧр-ва озырлун, вӧр-ваӧн вӧдитчан да экология комитетӧн веськӧдлысь Сергей Артеев выступитіс РФ Каналан Думалӧн парламентса кывзысьӧмъяс вылын. Мероприятиеын участвуйтісны федеральнӧй министерствоясӧс да ведомствоясӧс, дінмуса канму власьт органъясӧс петкӧдлысьяс, а сідзжӧ бизнесменъяс, экологъяс да водзмӧстчысь йӧз да сёрнитісны странаыс вӧр юкӧн сӧвмӧдӧм йылысь.

Аслас тыръюӧрын Сергей Артеев висьталіс, мый Коми Республикаын энергия видзтан да производствоса колясъясӧн вӧдитчан уджтас серти вӧдитчӧны омӧль сикаса вӧрӧн. Шуам, эмӧсь ломтаса гранулаяс да брикетъяс вӧчан предприятиеяс, кутісны уджавны пу колясъяс вылын уджалысь некымын электростанция да кӧтельнӧй.

Тайӧ серпаслы оз лӧсяв вӧрӧн вӧдитчӧм, кодӧс пӧрӧдӧны мупытшкӧс туялігӧн, а сідзжӧ туяс, трубопроводъяс да электросетьяс стрӧитігӧн, выльмӧдігӧн да уджӧдігӧн.

«Вӧр кодекс серти тайӧ вӧр вылӧ инӧдыс Россия Федерациялӧн. Но вузавны сійӧс он вермы да сійӧ сісьмӧ пӧрӧдчанінъясын. Кык воӧн Коми  Республикаын вермисны вузавны сӧмын дас квайт прӧчентсӧ», – пасйис депутат.

Эм некымын петан туй. Колӧ сетны татшӧм вӧр вылӧ инӧдсӧ вӧрӧн вӧдитчысьяслы либӧ меставывса асвеськӧдлан органъяслы.

«Позьӧ и мӧд ногӧн вӧдитчыны тайӧ вӧрнас, мед сӧмын сійӧ вайис канмулы да гражданалы пӧльза. Йӧз дӧзмӧны сыысь, мый вӧрыс сісьмӧ», – лыддьӧ Сергей Артеев.

Талун Каналан Думаын эм федеральнӧй оланпас бала, кутшӧмӧс сетіс видлавны Карелия Республикаса Оланпас пыртан ссобрание, коді тшӧктӧ тӧд вылӧ босьтны тайӧ экологияса да экономическӧй мытшӧдсӧ. Нӧшта вӧзйӧны  урчитны Россия Федерациялы тайӧ вӧр вузалан либӧ иналан ног.

Такӧд йитӧдын Коми Республикаса Каналан Сӧветлӧн депутатъяс вӧзйӧны Каналан Думалы ошкыны тайӧ оланпас баласӧ, а Россия Федерацияса Веськӧдлан котырлы – канму да муниципальнӧй могъяс вылӧ бурмӧдны вӧдитчан ног.