Коми Республикаса Каналан Сӧветлӧн оланпастэчас да МСУ комитет бердын экспертнӧй сӧветлӧн заседание вылын видлалісны виччысьтӧмтор дырйи йӧзӧс юӧртӧм йылысь.

Кыдзи висьталіс Комиын МЧС медшӧр веськӧдланінса начальникӧс вежысь Виталий Поправка, республикаын уджалӧ ӧтувъя юӧртӧмлӧн автоматизируйтӧм тэчас, мый шымыртӧ дінмуын 74% олысьӧс. Но сійӧ оз нин лӧсяв талун, ёна важмӧма. Шуам, система оз йитчы ӧнія цифрӧвӧй телефоннӧй да телевизионнӧй станцияяяскӧд, ӧпаснӧй объектъясӧс да предприятиеясӧс локальнӧя юӧртан системаяскӧд, республикаса каръясын да районъясын оз тырмыны громкоговорительяс да электросиренаяс.

Талун лӧсьӧдісны да вӧчисны канму экспертиза проектно-сметнӧй  документациялысь, медым выльмӧдны да паськӧдны  тэчаслысь позянлунъяс. Ставнас та вылӧ ковмас нёльсё миллион гӧгӧр шайт.

Но, кыдзи пасйисны экспертнӧй сӧветӧ пырысьяс, ӧткымын мытшӧдсӧ позьӧ разьны ыджыд сьӧмтӧг овмӧдчӧминъясын кӧ лӧсьӧдасны юӧртӧмлысь локальнӧй системаяс. МЧС веськӧдланінлӧн юӧр серти, татшӧм примеръяс эмӧсь нин Вуктыл районын. Та кындзи, заседаниеса участникъяс вӧзйисны зільджыка вӧдитчыны юӧртӧм могысь мобильнӧй йитӧдӧн да телевидениеӧн, а ылі олан пунктъясын тайӧ уджӧ кыскыны сиктса старостаясӧс.

Владимир Косов серти, экспертнӧй сӧветӧ пырысьясӧн видлалӧм мытшӧдъяс ёна майшӧдлӧны Коми Республикаӧс.

«Ми олам войвылын, кӧні тшӧкыда босьтӧ ваӧн, сотчӧ вӧр. Миян мутасын эмӧсь ӧпаснӧй производствояс, та вӧсна колӧ вӧчны ставсо, медым дугдывтӧг уджалісны юӧртан средствояс. Зэв тӧдчана, мый ми талун кыпӧдім тайӧ мытшӧдъяссӧ. Кутам уджавны муниципалитетъяскӧд, видзӧдлам, мый позяс вӧчны оланпастэчас боксянь», - пасйис депутат.