Коми Республикаса Каналан Сӧветӧн Веськӧдлысь Игорь Ковзель дорӧ шыӧдчисны Сыктывкарын олысь тылса уджалысьяс. Вермӧмсянь 70 во тырӧм водзын найӧ корӧны, медым найӧс ӧчередьтӧг примитісны став медицина учреждениеын. Олӧма йӧз серти, мукӧд дырйи налы ковмӧ некымын час виччысьны ӧчередьын.

 «Коми Республикаса йӧзлы социальнӧй отсӧг йылысь» 55-РЗ №-а оланпасӧн урчитӧма, мый тылса уджалысьяслы ӧчередьтӧг сетны медицина отсӧг Коми Республика мутасын Коми Республикаса медицина организацияясын.

«Эз на лӧнь лоӧмтор, мый артмис Санкт-Петербургса вузасянінын. Сэні кувсис блокадница. Миян медицина заведениеяс виччысьоны, кор пӧрысь йӧз кутасны кувсьыны врач дорын пукалігӧн? Коммерческӧй организацияяс дивитӧм пыдди колӧ казьтыштыны канму учреждениеяслы налӧн кӧсйысьӧмъяс йылысь. Ассянь пыдди пуктӧй пӧрысьясӧс», - висьталіс И. Ковзель.

Коми Каналан Сӧветӧн Веськӧдлысь шыӧдчӧ дінмуса медицина учреждениеӧн веськӧдлысьяс дорӧ кутчысьны оланпасӧ да ӧчередьтӧг примитны тылса уджалысьясӧс. Республикаса гражданӧс корис пыдди пуктыны пӧрысь йӧзӧс. «Тылса уджалысьяс дорйисны Айму да талун налы оз ков сулавны ӧчередьын», - шуис сійӧ.

*Йӧзлы, кодъяс 1941 вося лӧддза-номъя тӧлысь 22 лунсянь 1945 вося ода-кора тӧлысь 9 лунӧдз уджалісны тылын куим тӧлысьысь эз этшаджык (татчӧ оз пыр СССР-са оккупируйтӧм мутасъясын уджалӧм), либӧ Айму вона Ыджыд тыш дырйи ас йылысь тӧждысьтӧг уджалӧмысь СССР-са орденъясӧн либӧ медальясӧн ошкӧмаяслы сетӧны татшӧм социальнӧй отсӧг:

1) тылса уджалысьяслы да налӧн аскотырӧ пырысьяслы мынтӧны оланінысь 50 прӧчентсӧ (татчӧ оз пыр лифтъяс уджӧдӧм да дзонталӧм,  бытӧвӧй да мукӧд коляс нуӧм);

2) тылса уджалысьяслы да налӧн аскотырӧ пырысьяслы мынтӧны коммунальнӧй услугаяслысь 50 прӧчентсӧ шоныдысь; пач ломтӧмӧн керкаясын олысьяслы вештӧны чорыд ломтас ньӧбӧмысь 50 прӧчентсӧ;

4) быд тӧлысся республиканскӧй сьӧма мынтӧм;

5) колисны Коми Республикаса медицина организацияясын, кӧні бурдӧдчисны тайӧ йӧз пенсия вылӧ петтӧдз, медицина отсӧг вылӧ инӧд, а сідзжӧ ӧчередьтӧг босьтны медицина отсӧг Коми Республика мутасын Коми Республикаса медицина организацияясын гражданалы дон босьттӧг медицина отсӧг сетӧм кузя канмусянь гарантияяслӧн мутасса уджтас серти.