Коми Республикаса Каналан Сӧветлӧн социальнӧй политика комитетын муніс уджалан сӧвещание, кӧні видлалісны туйяс вылын челядьлысь безопасносьт да дзоньвидзалун видзӧм сӧвмӧдӧм.

КР туй вылын неминучаысь видзан медшӧр канму инспектор Олег Блохин серти, кольӧм воын республикаын ёна содіс туйяс вылын пӧгибнитӧм челядьлӧн лыдыс. Автоинспекцияын лыддьӧны, мый серпассӧ позяс вежны сэк, кор ёнджыка кутам ӧлӧдны, торйӧн нин челядьӧс видзанінъясын да  школаясын. Уна велӧдан учреждениеын эмӧсь туйвывса городокъяс, кӧні велӧдчысьяс да быдтасъяс тӧдмасьӧны туйвывса правилӧясӧн.

Социальнӧй политика комитетӧн веськӧдлысь Михаил Брагин серти, йӧзӧн бӧрйӧмаяс кутасны вӧчны ставсӧ, медым республикаын татшӧм комплексыс содіс.

«Колӧ вӧчны сідзи, медым кага ичӧтсяньыс кужис асьсӧ кутны туй вылын. Позьӧ дасьтыны том бать-мамлы памяткаяс», – висьталіс депутат.

Сӧвещаниелӧн мӧд юкӧнын видлалісны дзоньвидзалун видзӧм сӧвмӧдӧм, торйӧн нин сьӧкыда воӧдчан районъясын медицина отсӧг сетӧм.

Кыдзи висьталісны профильнӧй министерствоӧс петкӧдлысьяс, республика ньобис ветлана диагностическӧй комплексъяс да лӧсьӧдӧма районкостса дзоньвидзалун видзан вит шӧрин. Уна вын мунӧ телемедицина сӧвмӧдӧм вылӧ да отсӧг ӧтилаӧдӧм вылӧ. Тайӧ отсаліс видлавны унджык гражданаӧс да кык пӧв чинтыны кувсьӧм. Депутатъяс пасйисны, мый мытшӧдсӧ колӧ разьны системнӧя. Тшӧкыда овлӧ сідз, мый йӧз оз тӧдны врачьяслӧн локтӧм йылысь, а исследованиеяслӧн результатъяс вӧсна колӧ мунны юрсиктӧдз либӧ весиг Сыктывкарӧдз. Та дырйи медикъяс асьныс оз тӧдны, кутшӧм специалистъяс колӧны олысьяслы. Такӧд йитӧдын парламентарийяс вӧзйисны лӧсьӧдны сьӧкыда воӧдчан мутасъяскӧд уджалан карта, кытчӧ колӧ пасйыны уджлысь колана туйвизьяс, а сідзжӧ вӧчӧм удж да планируйтан мероприятиеяс.

Сӧвещание вылын нӧшта видлалісны больничнӧй городокын туй дзоньталӧм. Кыдзи тӧдчӧдіс Михаил Брагин, туйыс сэні лёк стрӧитчан уджъяс вӧсна, кутшӧъясӧс кӧсйӧны вӧчны республиканскӧй да челядьлы  больничаясын.

«Ми ставсӧ видзӧдлім. Эм позянлун дзоньтасьны и туй бурмӧдны. Асфальт бурмӧдӧм вылӧ колӧ 20-30 миллион гӧгӧр шайт. Ме серти, республика вермас та вылӧ вичмӧдны сьӧм таво либӧ локтан воын», – пасйис Михаил Брагин.