Косму тӧлысь 2 лунӧ Коми Каналан Сӧветӧн Веськӧдлысь Игорь Ковзель ветліс Питирим Сорокин нима СГУ-ӧ да паныдасьліс «Форсайт» водзмӧстчысь студентъяслӧн школаӧ пырысьяскӧд.

Том йӧз медводз висьталісны спикерлы асланыс проектъяс да водзмӧстчӧмъяс йылысь, сэсся Игорь Ковзель вӧзйис мӧвпыштны сы вылын, кутшӧмӧн талун коло лоны лидерлы.

Студентъяс медводз вочавидзисны «коді ме талун» да «кодӧн кӧсъя лоны вит во мысти» юалӧмъяс вылӧ, тӧдмалісны кыдзи колӧ сувтӧдны могъяс да шедӧдны найӧс.

Игорь Ковзель вӧзйис студентъяслы сьӧкыдлунъясысь да шыбыльясысь не повны.  «Дерт, планъясыс вермасны вежсьыны, но таын лёкыс абу. Быд результат – тайӧ нин шедӧдӧмтор. Весиг абу бур, ӧд сійӧ ышӧдас олӧмын да тэнад лоас опыт. Тэ кутан нин тӧдны кытчӧ быть оз ков мунны», – вӧзйис Игорь Ковзель.

Паныдасьлігӧн студентъяс сетісны Каналан Сӧветӧн Веськӧдлысьлы уна юалӧм. Медводз, юасисны вит во вылӧ планъяс йылысь. Гӧсьт шуис, мый локтан кӧч тӧлысьын пырӧдчас бӧрйысьӧмъясӧ да локтан вит воӧн водзӧ кӧсйӧ уджавны Коми Республикаса Каналан Сӧветын. 

Та кындзи, студентъяс юасисны кыдзи спикер чукӧртӧ ассьыс котырсӧ, сэсся сёрнитісны дзоньвидза оласног да сёян. Паныдасьлӧм помын студентъяс аттьӧалісны Игорь Ковзельӧс ышӧдана сёрниысь да корисны нӧшта на волыны паныдасьлыны «Форсайтса» водзмӧстчысьяскӧд.