Косму тӧлысь 3 лунӧ муніс Коми Республикаса профсоюзъяс федерация сӧветлӧн  заседание, кутшӧмӧс сиисны КР профсоюзъяслӧн лунлы. Мероприятие вылын Коми Республикаса Каналан Сӧвет да Коми Республикаса профсоюзъяс федерация кырымалісны ӧтув удж йылысь артмӧдчӧм. Документсӧ кырымалісны Коми Каналан Сӧветӧн Веськӧдлысь Игорь Ковзель да Коми профсоюзъяслӧн федерацияӧн Веськӧдлысь Людмила Ляшенкова.

«Ті доръянныд уджалысьяслысь инӧдъяс, сулаланныд олысьяслӧн  социальнӧй гарантияяс дор, видзӧданныд уджлӧн ӧпастӧм условиеяс, ас кадӧ удждон мынтӧм бӧрся да мукӧдтор. Ме кӧсъя тӧдчӧдны, мый дінмуса веськӧдлан котыр да Каналан Сӧветлӧн депутатъяс медвылы тшупӧдӧ индӧ йӧзлысь зумыда олӧм, найӧс дорйӧм. Нимкодь, мый Профсоюзъяслӧн федерация сӧглас миянкӧд да отсалӧ миянлы тайӧ уджас. Зэв тӧдчанаӧн лоӧ, медым власьт да профсоюзъяс гӧгӧрвоисны ӧта-мӧдсӧ. Торйӧн тайӧ колӧ талунъя экономическӧй условиеяс дырйи, кор йӧзлы колӧ миянсянь отсӧг», – тӧдчӧдіс Игорь Ковзель республикаса профсоюзъяслӧн ӧтувӧ пырысьяс дорӧ шыӧдчӧмын. 

Артмӧдчӧмын пасйӧма ӧтув уджлысь медшӧр туйвизьяссӧ да формаяссӧ. Сідз, Каналан Сӧвет кӧсйӧ ӧтув уджавны Федерациякӧд гражданалӧн инӧдъясӧ инмысь оланпас балаяс дасьтігӧн да видлалігӧн. КР профсоюзъяслӧн федерация кутас пырӧдчыны тайӧ уджӧ, а сідзжӧ юӧртны  коллективнӧй акцияяс да удж кузя вензьӧмъяс йылысь.