Коми Республикаса Каналан Сӧветын чукӧртчывліс Президиум. Медшӧрнас вӧлі косму тӧлысь 16 лунся сессиялысь сёрнитантор видлалӧм. Депутатъяслы ковмас видлавны 35 унджык юалӧм.

Сідз, медводдза лыддьысьӧмъясын депутатъяс гӧлӧсуйтасны «Коми Республикаын кадетской велӧдӧм йылысь» 46 №-а КР оланпас бала вӧсна.

Нӧшта депутатъяс видлаласны «КР Каналан Сӧветлӧн депутатъяслӧн депутат удж кузя КР торъя оланпасъясӧ вежсьӧмъяс пыртӧм йылысь» оланпас бала. Тайӧ стӧчмӧдӧмъяс серти чинас пыр уджалысь депутат лыд 10 мортӧдз. Оланпассӧ кӧ вынсьӧдасны, сэки пыр уджалан подув вылын кутас уджавны Коми Республикаса Каналан Сӧветӧн Веськӧдлысь, сійӧс вежысьяс, Коми Республикаса Каналан Сӧветлӧн комитетъясӧн, а сідзжӧ пыр уджалысь комиссияясӧн веськӧдлысьяс.

Документъяс пиысь медся ышӧданаыс «2015 во вылӧ да 2016 да 2017 воясся планӧвӧй кадколаст вылӧ республиканскӧй сьӧмкуд йылысь» Коми Республикаса оланпасӧ вежсьӧмъяс пыртӧм йылысь» оланпас бала. Дінмуса парламентлӧн депутатъяс шуисны бурджыка сійӧс видлавны уджалан  сӧвещание вылын, коді мунас косму тӧлысь 10 лунӧ Сьӧмкуд да  экономическӧй политика комитетын.