Косму тӧлысь 16 лунӧ КР Каналан Сӧветын восьтісны «Айму вӧсна Ыджыд тышын вермӧмлы 70 во тырӧмлы сиӧм том йӧзлӧн 70 проект» IV Республиканскӧй выставка. Мероприятиесӧ котыртіс Коми Каналан Сӧвет  Питирим  Сорокин нима Сыктывкарса карса университет да КР том йӧзлӧн агентство. Выставкаын участвуйтысьясӧс да гӧсьтъясӧс чолӧмаліс Коми Республикаса Каналан Сӧветӧн Веськӧдлысь Игорь Ковзель.

«Лыддя, мый колӧ котыртны том йӧзлысь выставкаяс, социальнӧй проектъяслысь выставкаяс, медым унджык йӧз тӧдмасисны тіян уджкӧд, – пасйис И. Ковзель. – Став проектыс зэв колана. Кӧсъя аттьӧавны челядьос уджысь».

Выставкаыс мунӧ «Социальные проблемы глазами молодых – 2015» студентъяслӧн, аспирантъяслӧн да том туялысьяслӧн XIXвойтыркостса  научно-практическӧй конференция пытшкын. Экспертнӧй группаын уджалісны оланпас пыртан да олӧмӧ пӧртан власьтӧс, коммерческӧй организацияясӧс, банкъясӧс да социальнӧя уджалысь некоммерческӧй  организацияясӧс петкӧдлысьяс, найӧ видлалісны проектъяссӧ 8 туйвизь серти – челядьлы отсӧг, олӧмаяслы отсӧг, вермытӧмъяслы отсӧг, пикӧ воом йӧзлы отсӧг, спорт да дзоньвидза оланног, челядьӧс да том йӧзӧс патриотическӧя быдтӧм-сӧвмӧдӧм, йӧз пӧвстын социальнӧй активносьт сӧвмӧдӧм да экология. Кывкортӧдъяссӧ вӧчасны косму тӧлысь 22 лунӧ СГУ-ын.