Олег Алтуховкӧд прӧститчыны локтісны рӧдвужыс да матыссаясыс, уджъёртъясыс да Каналан Сӧветса аппарат, дінмуса олӧмӧ пӧртысь власьт органъясӧс да ӧтйӧза котыръясӧс петкӧдлысьяс.

Панихида дырйи депутатъяссянь шог юкис Коми Республикаса Каналан Сӧветӧн Веськӧдлысь Надежда Дорофеева.

«Талун ставлы зэв шог да сьӧкыд лун. Бӧръя туйӧ ми колльӧдлам зэв бур мортӧс, надёжнӧй ёрткӧд да уджъёрткӧд, збыль профессионалкӧд, коді олӧмсӧ сетіс Коми Республикалы. Олег Алексеевичкӧд медводдза тӧдмасигӧн сійӧ петкӧдліс асьсӧ надёжнӧй, мудер да кывкутана мортӧн. Татшӧмӧн сійӧ коляс менам паметьын. Олег Алексеевичлӧн кувсьӧм зэв ёна инмис Каналан Сӧветлы, ме юка шог сылӧн рӧдвужкӧд да матыссаяскӧд», - висьталіс Коми Каналан Сӧветӧн Веськӧдлысь.

Дінмуса парламентӧ локтӧны телеграммаяс. Ыджыд шог юкӧны Россия Федерацияса Каналан Думалӧн депутатъяс да Федерация Сӧветӧ пырысьяс, республикаса муниципальнӧй юкӧнъясӧн юрнуӧдысьяс.

Олег Алтуховӧс гуаласны Сыктывкарса Краснозатонской шойнаын.