Кыдзи пасйис Комитетӧн веськӧдлысь Нина Нестерова, федеральнӧй, дінмуса да меставывса тшупӧдъясын канму да муниципальнӧй служащӧйяслысь пенсия инӧдъяс лӧсьӧдӧмын ӧтувъя видзӧдлас урчитӧм кузя кыптӧ уна юалӧм.

Оланпас серти вочасӧн содӧ 15 восянь 20 воӧдз канму гражданскӧй службаын медічӧт стаж ыджда, кутшӧм серти уна во уджалӧмысь урчитӧны пенсия да сылысь ыдждасӧ. Вочасӧн кӧсйӧны содтыны 2025 во кежлӧ 60 арӧссянь 65 арӧсӧдз канму гражданскӧй службаын медыджыд арлыд.

Та кындзи, оланпас бала серти вочасӧн содас пенсия арлыдыс 65 арӧсӧдз, кор урчитӧны да мынтӧны пӧрысьлун серти страхуйтан пенсиясӧ йӧзлы, кодъяс уджалісны РФ канму гражданскӧй службаын, муниципальнӧй службаын да РФ канму чинын, РФ субъектъяслӧн канму чинын, а сідзжӧ муниципальнӧй чинын пыр уджалан подув вылын.

Сӧвещаниеса участникъяс воисны ӧти кывйӧ, мый оланпас балалысь ӧткымын положениесӧ колӧ сюсьджыка видлавны. Оланпас вынсьӧдӧм бӧрын ковмас республиканскӧй оланпастэчассӧ вайӧдны ӧтвыйӧ федеральнӧйкӧд. Тайӧ оланпас баласӧ Каналан Думаса депутатъяс видлаласны медводдза лыддысьӧмъяс дырйи ӧшым тӧлысь 18 лунӧ.