Кыдзи пасйис Сӧветъясӧн юрнуӧдысьяслӧн сӧветӧн веськӧдлысь, Каналан Сӧветӧн веськӧдлысьӧс медводдза вежысь Александр Макаренко, татшӧм семинарсӧ нуӧдны мӧвпыс чужис дінмуса парламентлӧн депутатъяслӧн удж кузя муниципалитетъясӧ ветлігӧн.

«Уна депутатлы, торйӧн нин выльяслы, оз тырмы ӧткымын юалӧм кузя юӧр. Бӧрйӧм темалӧн коланлуныс зэв тӧдчана, талун семинарын участвуйтӧ 230 мортысь унджык», – тӧдчӧдіс вице-спикер.

Сьӧмкуд, вот да экономическӧй политика комитетӧн веськӧдлысь Дмитрий Шатохин алас сёрниын пасйис, мый республиканскӧй сьӧмкуд вынсьӧдігӧн депутатъяс нуӧдісны 19 мероприятие, кӧні видлалісны медшӧр 16 канму уджтас. Парламентарий серти, муниципальнӧй сьӧмкудъяс дасьтігӧн колӧ вӧдитчыны уджтасса принципӧн, меставывса асвеськӧдлан органъяслӧн тшупӧдын позьӧ уджӧдны сьӧмкуд видлалан сӧгласительнӧй комиссияяс.

Республикаса сьӧм овмӧс министрӧс вежысь Алексей Маегов серти, республиканскӧй сьӧмкудсӧ лӧсьӧдісны некымын медшӧр верктуй вылӧ мыджсьӧмӧн. Тайӧ социальнӧй кӧсйысьӧмъяс збыльмӧдӧм, Россияса Президентлысь «майскӧй» индӧдъяс тӧд вылӧ босьтӧмӧн, сьӧкудлысь дефицит да канму да муниципальнӧй уджйӧз чинтӧм, а сідзжӧ рӧскодъяслысь окталун содтӧм. Став тайӧ принцип вылӧ колӧ мыджсьыны и меставывса власьтлы медшӧр сьӧма документ дасьтігӧн.

Сёрниыс кыптіс и уджмогъяс йылысь, кутшӧмъясӧс республиканскӧй тшупӧдысь сетісны муниципальнӧй районъяслы да кар кытшъяслы. Стӧчджыка кӧ, вӧзйисны выльпӧв видлавны субвенцияяслысь ыдждасӧ, мый сетӧны кӧзяинтӧм понъясӧс кыйӧм да видзӧм вылӧ, а сідзжӧ бать-мамтӧм челядьӧс оланінӧн могмӧдӧм вылӧ. Алексей Маегов серти, талун дінмуса Веськӧдлан котырын видлалӧны бать-мамтӧм челядькӧд удж республиканскӧй тшупӧдӧ сетӧм йылысь юалӧм.

Нӧшта видлалісны дінму пытшкын чӧжӧс выльысь юклӧм. Сідз, вылыс вот базаа муниципалитетъяс чукӧртӧм сьӧмлысь ыджыдджык пайсӧ сетӧны республиканскӧй сьӧмкудйӧ, а сэсся тайӧ сьӧмсӧ ыстӧны мукӧд карлы да районлы отсалӧм могысь. Александр Макаренко вӧзйис тайӧ мытшӧдсӧ видлавны Сӧветъясӧн юрнуӧдысьяслӧн сӧветса локтан заседание вылын.

Сідзжӧ видеосеминарса участникъяс видлалісны меставывса власьтлысь муниципальнӧй видзӧдан-арталан органъяскӧд ӧтувъя удж.