«Кыкнан кандидатыслӧн бур нималӧм, эм вылыс тшупӧда тӧдӧмлунъяс, а сідзжӧ мортлысь да гражданинлысь инӧдъяс да вӧля юкӧнын тӧдӧмлунъяс, найӧс дорйӧмын бур удж. Каналан Сӧветлӧн Уджаланарт серти Президиумлы колӧ бӧрйыны ӧти кандидатура да ыстыны вӧзйомсӧ сӧгласуйтӧм могысь Россия Федерацияын мортлы инӧдъяс дорйысьлы», – висьталіс КР Каналан Сӧветлӧн оланпастэчас да меставывса асвеськӧдлӧм кузя комитетӧн веськӧдлысь Нина Нестерова.

Президиумӧ пырысьяс пиын унджыкыс ошкисны Надежда Быковскаяӧс. Россия Федерацияын мортлы инӧдъяс дорйысьӧн сӧгласуйтӧм бӧрын дінмуса парламентлы сетасны видлавны Коми Республикаын мортлы инӧдъяс дорйысьӧс чинӧ индӧм йылысь шуӧмлысь бала.

Нӧшта Президиумса заседание вылын депутатъяс вынсьӧдісны 2015 воын дінмуса Веськӧдлан котырлӧн удж йылысь Коми Республикаса Юралысьлысь удж вӧчысьлӧн тыръюӧр дорӧ Каналан Сӧветлысь юалӧмъяслысь лыддьӧг. Кыдзи гӧгӧрвоӧдіс Коми Каналан Сӧветлӧн Веськӧдлысь Надежда Дорофеева, депутатъясӧн лӧсьӧдӧм лыддьӧгын 15 юалӧм медшӧр туйвизьяс серти: сьӧмкуд, вот да экономическӧй политика, социальнӧй политика, транспорт да связь кузя юалӧмъяс, оланін политика, уджавны пырӧм да уджӧн могмӧдӧм, объектъяс стрӧитӧм, велӧдчӧм, канму да муниципальнӧй веськӧдлӧм.

Тані жӧ парламентарийяс видлалісны Россия Федерацияса Каналан Думаӧ оланпас вӧзъян водзмӧстчӧмъясӧн шыӧдчӧм йылысь кык вӧзйӧм. Медводдзаыс – «Россия Федерацияса Олан кодекслӧн 44 статьяӧ вежсьӧм пыртӧм йылысь» федеральнӧй оланпас бала серти. Стӧчмӧдӧмъяс серти, уна патераа керкаын эмбур кутысьяслӧн ӧтувъя чукӧртчӧм оз вермы примитны керка выльмӧдӧм йылысь, овмӧсса стрӧйбаяс кыпӧдӧм, ӧтувъя эмбур капитальнӧя дзоньталӧм йылысь решение сэк, кор найӧ йитчӧмны вермытӧмъяслӧн мытшӧдтӧг ветлӧмкӧд.

Мӧд оланпас вӧзъян водзмӧстчӧмыс инмӧ «Гражданалысь, кодъяс серти колӧ урчитны опека либӧ попечительство, инӧдъяс, вӧля да оланпас серти кӧсйӧмъяс дорйӧм вынсьӧдӧм могысь Россия Федерацияса ӧткымын оланпас пыртан актӧ вежсьӧмъяс пыртӧм йылысь» федеральнӧй оланпас балалы. Вӧзйӧм вежсьӧмъясыс содтӧны опекун либӧ попечитель дорӧ корӧмъяс. Стӧчджыка кӧ, вӧзйӧны содтыны РФ аскотыр кодекса 146 статьяӧ положение, мый серти опекунъясӧн либӧ попечительясӧн оз вермыны лоны йӧз, кодъяс пыр олӧны мыждӧмаяскӧд, бать-мамлысь инӧдъяс босьтӧмаяскӧд, хроническӧй алкоголизмӧн либӧ наркоманияӧн висьысьяскӧд.

Та кындзи, Президиумса заседание вылын депутатъяс вынсьӧдісны Коми Республикаса VI бӧрйӧм Каналан Сӧветлӧн I сессияса V заседаниелысь сёрнитантор. Сійӧ мунас ӧшым тӧлысь 17 лунӧ. Парламентарийяслы ковмас видлавны 30-ысь унджык юалӧм.