Аслас сёрниын Валентина Жиделева орччӧдіс талунъя стрӧитан отрядъясӧс да квайтымын-кӧкъямысдас воясся студентъяслӧн ӧтувъяскӧд. Висьталіс сійӧ кадколастӧ вына оланпас пыртан база йылысь. Сёрӧнджык, власьт органъясӧс петкӧдлысьяскӧд да удж сетысьяскӧд «гӧгрӧс пызан дырйи», кутшӧм муніс Иван Куратов нима Сыктывкарса гуманитарно-педагогическӧй колледжын бара на косавліс тайӧ тема дорӧ.

«Коймӧд семестр – йӧзӧс велӧдӧмын тырвыйӧ семестр. Тайӧ уджвывса да чужан му радейтӧмӧн быдтӧм, творческӧй водзмӧстчӧмъяс сӧвмӧдӧм. Та вӧсна талун миянлы колӧ сетны стӧч вочакывъяс, медым 2016 воын  студентъяслӧн отрядъяс бура велӧдчисны. Колана ногӧн висьтавлісны форум восьтігӧн: «Челядьлӧн медбурыс водзын!». Тайӧ тадзи, но сӧмын оз ков вунӧдны воддза ӧтувлысь бурсӧ. Шуам, сӧветскӧй кадӧ студентъяслӧн  отрядъяслысь эз босьтны чӧжӧс вот, торйӧн мездвылісны вотысь и удж сетысьясӧс. Кыдзи оланпас пыртысь, меным колӧ кыпӧдны тайӧ юалӧмъяссӧ Каналан Сӧветын», – содтіс дінмуса парламентлӧн вице-спикер.