Медшӧр юалӧмъяс пиын тавося сьӧмкудйӧ вежсьӧмъяс пыртӧм. Чӧжӧсыс -  60,2 миллиард шайт, рӧскодыс – 67,5 миллиард шайт.

Оланпас пыртан вӧзйӧмъяс инмӧны электроэнергетикалы. Республикаса парламентарийяс кӧсйӧны шыӧдчыны Каналан Думӧ, медым вӧлі позянлун котыртны ылі олан пунктъясын ичӧт электростанцияяс да дугӧдны генерируйтан компанияяслы вузавны электроэнергия мукӧд фирмалы водзӧ вузалӧм могысь.

 Нӧшта ӧти юалӧмыс йитчӧма йӧзлы социальнӧй услугаяс сетӧмкӧд. Лӧсялана оланпассӧ вынсьӧдісны во сайын. Нӧшта депутатъяс видлаласны «Коми Республикаын муниципальнӧй юкӧнса сикт овмӧдчӧминъяслӧн меставывса тӧдчанлуна ӧткымын юалӧм йылысь» РК Оланпасӧ вежсьӧмъяс йылысь» оланпас бала, мый серти войтыркостса йитӧдъяс ёнмӧдӧм кузя уджмогъяссӧ сетны сиктса овмӧдчӧминъяслӧн тшупӧдысь муниципальнӧй районъяслӧн тшупӧдӧ.

Та кындзи, парламентарийяс пыртасны вежсьӧмъяс «Коми Республикаса общественнӧй палатаӧ пырысьясӧс индӧм йылысь» шуӧмӧ. Валентина Жиделева да Альмир Бадыков пыдди Общественнӧй палатаӧ вӧзйӧны пыртны Сыктывкарлӧн Эжва районын карса больничалӧн  неврологическӧй юкӧнӧн веськӧдлысь Григорий Максимовӧс да Коми Республикаса уна челядя аскотыръяслӧн ассоциацияса правлениеӧ пырысь Елена Щербинаӧс.