Выльторъяс

Шойччанінъяс бурмӧдӧм вылӧ республикалы сетасны 7,7 миллион шайт

Кыдзи пасйис Сьӧмкуд, вот да экономическӧй политика комитетӧн веськӧдлысьӧс вежысь Дмитрий Кологривый, республикалы федеральнӧй сьӧмкудйысь сетасны 7,7 миллион шайт, медым бурмӧдны шойччанінъяс, торйӧн нин карса паркъяс.

Вӧр-ва озырлун, вӧр-ваӧн вӧдитчан да экология комитетӧн веськӧдлысь Василий Смалий висьталіс оланпас бала йылысь, мый серти реестрӧ пыртӧм казакъяслӧн котыръяслы сетасны му. Документ серти му кутасны аукционтӧг сетны кӧртымалӧмӧн олан пунктъяс сайысь, медым сэні котӧртны  видз-му овмӧсса удж да важся оласног.

Нӧшта заседание вылын депутатъяс видлаласны Россия Федерацияса Канму Думаӧ оланпас пыртӧм йылысь шуӧм. Документыс вӧзйӧ нюжӧдны му пытш туялӧмлысь кадколастсӧ 5 восянь 7 воӧдз.

Кыдзи пасйис Оланпастэчас да меставывса асвеськӧдлӧм кузя комитетӧн веськӧдлысь Нина Нестерова, оланпас балаяслӧн тӧдчана пайыс сиӧма канму власьт органъяслӧн удж бӧрся ӧтйӧза контрольлы. Тайӧ уджсӧ кутас вӧчны Общественнӧй палата, Коми Республикаса Каналан Сӧвет, олӧмӧ власьт пӧртысь органъяс бердын ӧтйӧза сӧветъяс, а сідзжӧ муниципальнӧй юкӧнъяслӧн ӧтйӧза сӧветъяс. Общественнӧй контролёръяс вермасны шыӧдчыны быд канму органӧ, паныдасьны чина йӧзкӧд, нуӧдны экспертизаяс, мониторингъяс да прӧверкаяс, пырӧдчыны тӧдчана решениеяс видлалӧмӧ. Нӧшта вӧзйӧны нюжӧдны дінмуса Ӧтйӧза палатаӧ пырысьяслысь уджалан кадколастсӧ 2 восянь 3 воӧдз. Тайӧ вежсьӧмъясыс инмасны палаталӧн локтан составлы, коді кутас уджавны 2018 вося вӧльгым тӧлыссянь.

Нӧшта ӧти оланпас бала инмӧ студентъяслӧн отрядъяслы. Социальнӧй политика комитетӧн веськӧдлысь Наталья Паншина серти, тайӧ туйвизьыс том йӧз пӧвстын зэв колана. Ставнас Комиын татшӧм ӧтувъясӧ пырӧ 600-ысь унджык морт.

Та кындзи, депутатъяс водзын петкӧдчас Коми Республикаса Юралысь Сергей Гапликов да висьтасяс дінмуса Веськӧдлан котырлӧн 2016 вося удж йылысь.