Семинарсӧ восьтіс Коми Республикаса Каналан Сӧветӧн Веськӧдлысь Надежда Дорофеева да тӧдчӧдіс, мый семинарлӧн могыс гӧгӧрвоӧдны федеральнӧй тшупӧдса вежсьӧмъяс. «Стӧчмӧдӧмъяс инмӧны Муниципальнӧй юкӧнлысь подувпуктас канмусянь пасйӧмлы. Подувпуктас - тайӧ муниципалитетлӧн медшӧр нормативнӧй документ. Сійӧ урчитӧ сылысь статуссӧ, меставывса юалӧмъяс решитӧмын йӧзлӧн участвуйтан сикасъяс да ног, меставывса асвеськӧдлан органъяс лӧсьӧдан ног да мукӧд тӧдчана положение», – висьталіс парламентса спикер.

Коми Республикаса Каналан Сӧветлӧн оланпастэчас да меставывса асвеськӧдлан комитетӧн веськӧдлысь Нина Нестерова висьталіс вежсьӧмъяс йылысь, кутшӧмъяс инмасны карса да сиктса овмӧдчӧминъяслы. «Водзынджык налы ковмывліс Подувпуктассӧ лӧсьӧдны федеральнӧй оланпастэчас серти дзик пыр вежсьӧмъяс вынсьӧдӧм бӧрын. Тайӧ овлывліс зэв тшӧкыда да торкис удж. Талун оланпас шуӧ, мый вежсьӧмъяссӧ позяс пыртны ӧтчыдысь во джынйын. Водзынджык овмӧдчӧминса юралысь вермис гӧлӧсуйтны медбӧрын  да депутат гӧлӧсыс кӧ ӧткодь вӧлі, сэки сылӧн гӧлӧсыс лыддьысис медся вынаӧн. Ӧні овмӧдчӧминса юралысьлӧн гӧлӧсыс ставлӧн кодь. Талун оланпас серти овмӧдчӧминса администрацияӧн юрнуӧдысьӧс бӧрйӧны кандидатъяс пиысь конкурснӧй комиссия отсӧгӧн. Водзынджык тайӧ инӧдыс вӧлі сӧмын муниципальнӧй юкӧнъяслӧн», – гӧгӧрвоӧдіс выльторъяссӧ Нина Нестерова.

Гӧгӧрвоӧдӧмъяс висьталіс РФ юстиция министерстволӧн Комиын веськӧдланінӧс петкӧдлысь Полина Жиганова да Каналан Сӧветын Коми Республикаса Юралысьӧс пыр петкӧдлысь Дмитрий Толстов. Найӧ жӧ вочавидзисны муниципальнӧй юкӧнъясӧс петкӧдлысьяслӧн юалӧмъяс вылӧ.