Час чӧжӧн воис Ухтаысь, Сыктывкарысь, Коми юркарса посёлокъясысь 12 звӧнӧк. Унаӧн юасисны уна патераа керкаяс капитальнӧя дзоньталӧм йылысь. Сідз, юркарын олысь норасис, мый сылы оз во капитальнӧя дзоньталӧм вылӧ квитанция. Уна патераа керкаяс капитальнӧя дзоньталан дінмуса фондӧн юрнуӧдысьлысь удж вӧчысь Александр Подольский серти, талун фондлӧн абу патераяс кутысьяс йылысь тыр да збыль юӧр. Росреестркӧд ӧтув эрдӧдӧны мытшӧда объектъяс.

Татьяна Саладина серти, тайӧ мытшӧдыс йитчӧма сыӧн, мый приватизируйтӧм патераяс оз пыр пыртны дінмуса операторлӧн базаӧ. Олысьяслы вӧзйӧны шыӧдчыны дінмуса операторлӧн офисӧ эмбур вылӧ документъясӧн. Сэки объектсӧ пыртӧны базаӧ, уджйӧзыс оз кут содны да квитанцияяссӧ кутасны ас кадӧ вайны.

Нӧшта юасисны коммунальнӧй услугаясысь мынтан ног йылысь. Сыктывкарын олысь гӧгӧрвоӧдіс, мый сылӧн патераын абу учёт приборъяс да сылӧн квитанцияясын оланін да коммунальнӧй услугаясысь доныс ёна содӧма.

Кыдзи гӧгӧрвоӧдіс КР стрӧитчӧм, оланін да техническӧй дӧзьӧр (контроль) службаӧн юрнуӧдысь Роман Шашев, 2017 вося тӧвшӧр тӧлысь 1 лунсянь коммунальнӧй услугаясысь кутасны мынтыны асэмбур кутысь лыд серти сэк, кор оланінын некод абу пасйӧма. Кор патераын абу учёт приборъяс, сэки вӧдитчӧны медыджыд коэффициентӧн. Татьяна Саладина серти, тайӧ вежсьӧмъясыс туйдӧдасны индыны учёт приборъяс.

Звӧнитчысьяс нӧшта юасисны веськӧдлан компанияяслӧн удж бӧрся контроль йылысь, уличаясысь лым весалӧм йылысь, биаруӧн могмӧдӧм да коммунальнӧй услугаясысь дон арталӧм йылысь. Став юалӧм вылӧ сетісны вочакыв, пыр уджалысь комиссия шыӧдчӧмъяссӧ босьтіс контроль улӧ.