Заседание восьтігӧн Россияса Рытыв-Войвыв Парламентса Ассоциацияӧн Веськӧдлысь, Архангельск обласьтса депутатъяслӧн собраниеӧн веськӧдлысь Виктор Новожилов аттьӧаліс Коми Республикаса Каналан Сӧветӧн Веськӧдлысь Надежда Дорофееваӧс бура паныдалӧмысь да мероприятие кыпыда нуӧдмысь.

«Коми Республикаын ме мӧдысь нин, волі пасйыны 95 вося тшупӧда пас. Дінму сӧвмӧ, бурмӧдӧ йӧзлысь олӧм да кыпӧдӧ экономика», – тӧдчӧдіс Виктор Новожилов.

Чукӧртчысьясӧс чолӧмаліс Коми Республикаса Юралысь Сергей Гапликов. Водзӧ видзӧдласа темаясӧн сійӧ пасйис Россияса Арктика сӧвмӧдӧм, транспортӧн сибалӧм да социальнӧй отсӧг сетӧм.

«Медшӧр теманас лоӧ Россияса Арктика сӧвмӧдӧм, ӧд унджык Рытыв-Войвывса дінмуяслӧн мутасъяс пырӧны сэтчӧ. Тайӧ уджысь оз вермыны бокӧ вешйыны и найӧ, кодъяс оз пырны Арктическӧй зонаӧ, – миянӧс ӧтувтӧны йитӧдъяс: логистическӧй, экономическӧй, уджалан. Тайӧ темасӧ кутасны видлавны Архангельскын Арктическӧй форум вылын, кӧні кутас участвуйтны Россияса Президент. Та вӧсна, Рытыв-Войвыв парламентарийяслӧн  Ассоциациялӧн решениеяс вермасны пуктыны подув форумса решениеяслы», – тӧдчӧдіс Коми Республикаса Юралысь.

Кыдзи пасйис Коми Республикаса Каналан Сӧветӧн Веськӧдлысь Надежда Дорофеева, Россияса Рытыв-Войвыв Парламентса Ассоциация отсалӧ тӧдчӧдны федеральнӧй тшупӧдын дінмуяслысь водзмӧстчӧмъяс.

«Медшӧр юалӧмъяс кузя сӧгласуйтӧм видзӧдлас отсалӧ миянлы дасьтыны ӧтувъя решениеяс, дасьтыны эскӧдана подувъяс да сетны Россияса Рытыв-Войвыв серти аналитика. Конференцияяс да Президиум дырйи ми век видлалам ёсь, талунъя олӧмлы лӧсялана юалӧмъяс», – юксис Надежда Дорофеева.

Дінмулӧн тӧдчана примеръяс пиын ӧти «Му пытш йылысь» федеральнӧй оланпас. Сэтчӧ пыртісны вежсьӧмъяс, кутшӧмъяс йитчӧмаӧсь мупытшса ва перйысь неыджыд предприятиеяслӧн уджкӧд.

Заседание вылын парламентарийяс видлалісны сизим юалӧм. Йӧзӧн бӧрйӧмаяс шуисны котыртны ПАСЗР-ын аграрнӧй политика да чери овмӧсса комплекс кузя пыр уджалысь выль комитет, а сідзжӧ нуӧдны Ылі Асыввыв да Забайкалье Парламентскӧй Ассоциацияӧс петкӧдлысьяскӧд ӧтувъя заседание.