Надежда Дорофеева тӧдчӧдіс, мый конференциялӧн Россия Федерацияса войтырлысь кывъяс видзӧмын да паськӧдӧмын ыджыд тӧдчанлун. «Сійӧ ӧтувтіс ставӧс, кодлы абу веськӧдь чужан кывъяслӧн аскиалуныс: кыв туялысьясӧс, велӧдысьясӧс, велӧдӧм да национальнӧй ӧтйӧза организацияясӧс петкӧдлысьяӧс. Эска, мый ті быд боксянь видлаланныд электроннӧй гӧгӧртасын кывъяс паськӧдӧм кузя юалӧмъяс. Талун, глобализация кадӧ, тайӧ темаыслӧн торъя тӧдчанлун. Унджык йӧз кутісны лыддьыны небӧгъяс, справочникъяс да кывкудъяс не лыддьысянінъясын, а планшетъясын. Та вӧсна колӧ вӧдитчыны юӧртан технологияясӧн», – пасйис дінмуса парламентӧн веськӧдлысь.

Надежда Дорофеева серти,  электроннӧй письменносьт отсалӧ вӧдитчыны ас кывъя материалъясӧн, а сідзжӧ сетӧ позянлун тӧдмасьны мукӧд вотырлӧн кывъясӧн.

 «Дерт, татшӧм культурнӧй озырмӧдӧмыс сӧмын ёнмӧдӧ миян уна сикас войтыра канмуӧс. Чужан кывъяс видзӧм да паськӧдӧм, а сідзжӧ  электроннӧй письменносьтӧн вӧдитчӧм – тайӧ тані пукалысьяслы ӧтув могъяс. Конференция сетӧ позянлун юксьыны уджӧн», – пасйис Надежда Дорофеева.

Каналан Сӧветӧн Веськӧдлысь тайӧ юкӧнын бур пример вайӧдіс Кыв технологияяс шӧринлысь вӧчӧмтор – коми кывлысь национальнӧй корпус, коді лоӧ аслыспӧлӧс юӧртан да справочнӧй тэчасӧн.