«Татшӧмсяма удж миян эм. Республикаын бураа сӧвмӧдісны ичӧт проектъяс, кор олысьяс вӧзйисны олӧм бурмӧдан мӧвпъяс да пырӧдчисны сійӧс збыльмӧдӧмӧ. «Йӧзкостса сьӧмкуд» сетӧ гражданалы позянлун инмыны власьтӧн вынсьӧдӧм решениеясӧ, бӧрйыны каръяслы да районъяслы проектъяс, сетны ас вӧзйӧмъяс», – висьталіс Надежда Дорофеева.

«Йӧзкостса сьӧмкудлӧн» нӧшта тӧдчана буртор – сьӧмкудса шайтъяс видзтӧм. Став проектсӧ збыльмӧдӧны софинансируйтӧмӧн олысьяс отсӧгӧн. Та дырйи тшӧкыда овлӧ, мый йӧз уджалӧны да отсалӧны техникаӧн, стрӧитчан материалъясӧн. А медся тӧдчанаыс сыын, мый тӧждысьӧны ас киӧн вӧчӧмторъяс бӧрся.

Коми Республикаса Юралысьлӧн Администрацияса мутас сӧвмӧдан веськӧдланінса юрнуӧдысь Виктор Шевцов серти, проектсӧ збыльмӧдӧны нёль тшупӧдын. Медводдзанас чукӧртӧма 650-ысь унджык проект. Медся водзмӧстчысьясӧн вӧлісны Изьваса, Вуктылса, Воркутса да Выльгортса олысьяс. Мӧд да коймӧд тшупӧдъясын проектъяссӧ видлалісны меставывса асвеськӧдлан органъяс. Бӧръя тшупӧдын проектъяс видлалӧмӧ пырӧдчис Коми Республикаса Юралысьлӧн Администрация. Проектъяслысь вынсьӧдӧм лыддьӧгсӧ дасьтас ведомствокостса комиссия рака тӧлысь 30 лунся заседание вылын. 2017 воын та вылӧ урчитӧма 42 миллион шайтысь унджык.

Сьомкуд, вот да экономическӧй политика комитетӧн веськӧдлысь Степан Чураков серти, медым кыпӧдны проектъяслысь качество да тӧдчанлун, колӧ зільджыка кыскыны тайӧ уджас муниципальнӧй юкӧнъяслысь депутатъясӧс да администрацияясӧс.

«Тані колӧ торъя морт, коді вермас стӧча гӧгӧрвоӧдны ставсӧ, отсавны водзмӧстчысьяслы гижны тайӧ проектъяссӧ. 2017 вося кывкӧртӧдъяс серти став тырмытӧмторсӧ босьтам тӧд вылӧ, а проектас пыртам содтӧдъяс. Кутам вӧчны ставсӧ, медым та вылӧ содтыны сьӧм», – тӧдчӧдіс депутат.