Тайӧ туйвизьлы сӧвмыны отсалӧ сійӧ, мый миян эм уна колана сырьё – вӧр промышленнӧй комплекслӧн колясъяс, мыйысь артмӧ пытшскӧсса да ортсы рынокын колана прӧдукция. Депутатъяс, дінмуса промышленносьт, вӧр-ва озырлун, энергетика да транспорт министерствоӧс, муниципалитетъясӧс петкӧдлысьяс, водзмӧстчысь йӧз, туялысьяс, а сідзжӧ промышленникъяс шуисны, мый тайӧ уджсӧ колӧ водзӧ сӧвмӧдны.

Заседание восьтігӧн Коми Республикаса Каналан Сӧветӧн Веськӧдлысь Надежда Дорофеева пасйис, мый пуысь биоломтас промышленнӧй мында вӧчны отсалісны Коми Веськӧдлан котырӧн вынсьӧдӧм мераяс. Медводз, тайӧ субсидия сетӧм, а сідзжӧ недыр кад вылӧ видзан площадкаяс лӧсьӧдӧм.

«Колян вося гожӧмын вынсьӧдісны биоэнергетика сӧвмӧдӧм кузя «туйвыв карта». Сэні пасйӧма, мый социальнӧй юкӧнса объектъяс колӧ ломтыны пуысь гранулаясӧн да брикетъясӧн. Планӧ пыртӧма коммунальнӧй кӧтельнӧйяс стрӧитӧм да выльмӧдӧм. Из шом да мазут, а сідзжӧ электричество пуысь ломтас вылӧ вежӧм ёна чинтас шоныд да пӧсь ва вылӧ», – висьталіс Надежда Дорофеева.

Та кындзи, биоломтасӧн вӧдитчӧм кыпӧдас вӧр переработайтан предприятиеяслысь да вӧр заптан производствояслысь экономикасӧ да окталунсӧ, восьтас выль уджалан местаяс. Та йылысь висьталіс профильса министерстволӧн юкӧнса начальник Андрей Кривошеин.

Сы серти, локтан воясӧ «Коми шонтан компания» АК-ын пуысь ломтас вылӧ вуджӧдасны 60 гӧгӧр объект. 2021 во кежлӧ биоломтас вылын уджалысь кӧтельнӧйяслӧн лыдыс содас 96-ӧдз, а республикаса лунвыв районъясын, кӧні сӧвмӧма вӧр заптӧм да вӧр переработайтӧм, серпасыс ёна вежсяс – кутасны ломтысьны брикетъясӧн, пеллетъясӧн, чагӧн да пескӧн. Колян воын компания меставывса производительяслысь ньӧбис 4,5 сюрс тонна брикет, в 2021 воын кӧсйӧ ньӧбны 38 сюрс тонна. Нёль во мысти пӧшти куим пӧв содас чагӧн вӧдитчӧм да лоас 141 сюрс пл. куб. м. мында. Сідзкӧ, 2021 во кежлӧ Комиын джын кӧтельнӧйыс кутас ломтысьны биоломтасӧн.

«Гӧгрӧс пызан» вылын висьталісны, мый локтан воясӧ Комиын збыльмӧдасны биоэнергетика кузя нӧшта некымын гырысь проект. Сыктыв районын кӧсйӧны восьтыны вӧр пилитан колясъяс переработайтан, вонас кутасны инавны 50 сюрс кубометр мында. Во помӧдз «СевЛесПил» ИКК восьтас дінмуын пеллетъяс вӧчан медыджыд завод. Сійӧ вонас кутас лэдзны  42 сюрс тонна мындас дась прӧдукция. Пеллетъяс вӧчан ыджыд завод кыпӧдас «Лузалес» ИКК. Ӧні компанияӧн веськӧдлысьяс дасьтӧны проект да сырьёӧн могмӧдӧм.

Кывкӧртӧдъяс вӧчигӧн пасйисны, мый коло комплекснӧя сӧвмӧдны тайӧ туйвизьяс да тӧд вылӧ босьтны быд пӧлӧс видзӧдлас. Ковмас кӧ дасьтыны да вынсьӧдны биоэнергетика водзӧ сӧвмӧдӧм кузя оланпас, депутатъяс дасьӧсь пырӧдчыны уджӧ.