Вӧльгым тӧлысь 24 лунӧ Коми Республикаса Каналан Сӧветлӧн ыджыд залын муніс «Коми Республикаын духовнӧя вежсьӧм: мытшӧдъяс да водзӧ вылӧ могъяс» тема вылӧ быд вося парламентса паныдасьлӧм.

Мероприятиеыс муніс  XXVI войтыркостса Рӧштвоса велӧдан лыддьысьӧмъяслӧн дінмуса тшупӧд нуӧдігӧн. Таво видлалісны нравственнӧй донаторъяс да аскиалун. Паныдасьлӧм вылын участвуйтісны Коми Республикаса Каналан Сӧветлӧн депутатъяс, Сыктывкарса Епархиялӧн веськӧдлысь да поп-дякъяс, республикаса олӧмӧ пӧртысь власьт органъясӧс, велӧдан да ӧтйӧза организацияясӧс петкӧдлысьяс.

Республиканскӧй парламентлӧн депутатъяс нимсянь чукӧртчысьясӧс чолӧмаліс Коми Республикаса Каналан Сӧветӧн Веськӧдлысьӧс вежысь  Валентина Жиделева.

 «Зэв нимкодь, мый Коми Республикаса Каналан Сӧветын мунӧ татшӧм пыдди пуктана мероприятие. Талун ми вермам вензьыны, примитны решениеяс да вӧзйӧмъяс, – тӧдчӧдіс вице-спикер. – 2018 воын ми кутам пасйыны некымын тшупӧда пас. 1155 во тырӧ славяналӧн письменносьтлы. Кириллицаӧс лӧсьӧдісны 863 воын да сы отсӧгӧн ёна сӧвмис славяна муясын культура да литература, роч кыв. 2018 воын тырас 1030 во Русьын христианство примитӧмлы. 400 во сайын первопечатник Иван Федоров йӧзӧдіс медводдза роч азбука. Став тайӧ лоӧмторйыс отсаласны миянлы пӧртны олӧмӧ Рӧштвоса паныдасьлӧмъяс вылын сувтӧдӧм могъяс Чайта, мый  епархиялы да дінмуса велӧдан министерстволы талун нин колӧ планӧ сюйны тайӧ лунпасъяслы сиӧм мероприятиеяс».

Валентина Жиделева сиис ставлы кыпыд удж, бур сёрни, а сідзжӧ примитны колана решениеяс да вӧзйӧмъяс.

Парламентса паныдасьлӧм вылын кывкӧрталісны «Нравственнӧй донаторъяс да йӧзлӧн аскиалун» XXVI войтыркостса Рӧштвоса велӧдан лыддьысьӧмъяслӧн дінмуса тшупӧдлӧн конференцияяслысь, секцияяслысь да «гӧгрӧс пызанъяслысь» удж.

*** Войтыркостса Рӧштвоса велӧдан лыддьысьӧмъяслӧн медводдзаысь муніс 1992 воын. Тайӧ форумыс лоис аслыспӧлӧс вензяна инӧн, кӧні видлалӧны быд пӧлӧс мӧвпъяс, видзӧдласъяс, донъялӧмъяс  велӧдӧмын, педагогикаын да олӧмас, а сідзжӧ ӧтйӧза  моральын да ӧнія культураын.