Вӧльгым тӧлысь 28 лунӧ Санкт-Петербургса оланпас пыртан собраниелӧн депутатъяс паныдасьлісны Коми Республикаса Каналан Сӧветлӧн официальнӧй делегациякӧд. Коми парламентарийясӧс корис заксобраниеӧн веськӧдлысь Вячеслав Макаров.

Коми делегация нимсянь сёрнитіс Коми Республикаса Каналан Сӧветӧн Веськӧдлысь Надежда Дорофеева. Сійӧ аттьӧаліс кӧзяеваӧс шоныда паныдалӧмысь да пасйис, мый Санкт-Петербургса оланпас пыртан собрание медбуръяс лыдын, а сылысь нормативнӧй базасӧ Россия Федерацияса субъектъяс босьтӧны пример пыдди.

Паныдасьлӧмлысь кывкӧртӧдъяс йылысь висьталіс КР Каналан Сӧветлӧн оланпастэчас да меставывса асвеськӧдлӧм кузя комитетӧн веськӧдлысь Нина Нестерова. «Миян уджным неуна торъялӧ. Шуам, депутатъяс вермӧны гӧлӧсуйтны эскӧданпасӧн, медым выключитны сёрнитысьлысь микрофонсӧ. Сідзжӧ депутатъяс вермасны не гӧлӧсуйтны. Та кындзи, висигӧн, командировка дырйи, шойччигӧн найӧ вермӧны гӧлӧсуйтны эсканпас серти. Миян Каналан Сӧветлӧн Уджаланартын татшӧм положениеясыс абуӧсь», - пасйис Нина Нестерова.

Санкт-Петербургын ёна сӧвмӧма административнӧй инӧдъяс торкалӧмъяс йылысь дінмуса оланпастэчас Комиын лоис сӧмын 11 статья.

«Дерт, кутам тӧд вылӧ босьтны уджъёртъяслысь уджсӧ. Санкт-Петербургын вынсьӧдӧма Социальнӧй кодекс, кытчӧ ӧтувтӧма социальнӧй политикаын став оланпасъяссӧ. Ми гӧгӧрвоам, мый миян республикаын тшӧтш тайӧс колӧ вӧчны. Гӧгӧрвоана, мый тайӧ ыджыд удж, но ми Коми Веськӧдлан котыркӧд таӧдз воам», - висьталіс Надежда Дорофеева.

Коми Республикаса Каналан Сӧветлӧн делегацияӧ нӧшта пырисны Каналан Сӧветӧн Веськӧдлысьӧс вежысьяс Владимир Косов да Валентина Жиделева, Сьӧмкуд, вот да экономическӧй политика комитетӧн веськӧдлысь Степан Чураков да Олан да коммунальнӧй овмӧс кузя пыр уджалысь комиссияӧн веськӧдлысь Татьяна Саладина.