Ӧшым тӧлысь 1 лунӧ  медводдзаысь чукӧртчис Коми Республикаса Каналан Сӧветлӧн Коми кывлы канмусянь отсӧг йылысь вӧзйӧмъяс дасьтан уджалан котыр. Казьтыштам, республикаса парламент лӧсьӧдіс тайӧ недыр уджалысь органсӧ «Коми войтыр» МОД-лӧн вӧзйӧм серти. Парламентса спикер Надежда Дорофеева кырымаліс 65 №-а тшӧктӧмсӧ 2017 вося вӧльгым тӧлысь  27 лунӧ.

Уджалан котырӧ уджавны пырисны Каналан Сӧветлӧн депутатъяс, национальнӧй политика министерствоӧс, велӧдӧм, наука да том йӧзлӧн политика министерствоӧс, культура, туризм да архив удж министерствоӧс петкӧдлысьяс, а сідзжӧ «Коми войтыр» МОД-ын зільысьяс, заседание вылын нӧшта вӧлі Россия Федерацияса Федерация Сӧветӧ пырысь Валерий Марков, Коми Республикаын мортлысь инӧдъяс дорйысь Надежда Быковская, Коми ӧтйӧза палатаӧн веськӧдлысь Галина Кисилева да Россия Федерацияса ӧтйӧза палатаӧ пырысь Анна Чуракова.

Заседание восьтігӧн Надежда Дорофеева пасйис, мый татшӧм форматыс ӧтувтӧ водзмӧстчысьяслысь, депутатъяслысь да олӧмӧ власьт пӧртысь органъяслысь удж, отсалас аддзыны петан туйяс. Уджалан котырлӧн медшӧр могыс видзны чужан коми кыв.

«Коми кыв кыдзи канму кыв кутасны велӧдны бӧрйӧмӧн да миянлы колӧ вӧчны ставсӧ, медым челядь да бать-мам бӧрйисны велӧдны коми кыв. Тайӧс позяс вӧчны велӧдӧмлысь качество кыпӧдӧмӧн, ӧнія методикаӧн да технологияясӧн вӧдитчӧмӧн, мича литература отсӧгӧн», - тӧдчӧдіс спикер.

Оланпастэчас да меставывса асвеськӧдлӧм кузя комитетӧн веськӧдлысь Нина Нестерова гӧгӧрвоӧдіс, медым уджалан котырлӧн уджыс  бурджыка муніс, колӧ нӧшта лӧсьӧдны котырувъяс. Найӧ кутасны уджавны некымын туйвизь серти: дінмуса оланпастэчас бурмӧдӧм; канму кыв политика бурмӧдӧм; велӧдӧм; культура.

Ӧшым тӧлысь 5 лунӧдз вынсьӧдасны уджтасувъяс да кутасны уджавны воӧм вӧзйӧмъяс серти.