Выльторъяс
Коми парламентысь делегация уджалӧ «Арктика: талун да аскиалун» VII войтыркостса форумын
Ӧшым тӧлысь 4 лунӧ Санкт-Петербургын воссис «Арктика: талун да аскиалун» VII войтыркостса форум. Коми Республикаса Каналан Сӧветсянь форумын уджалӧны парламентӧн веськӧдлысь Надежда Дорофеева, веськӧдлысьӧс вежысь Валентина Жиделева да Вӧр-ва озырлун, вӧр-ваӧн вӧдитчан да экология комитетӧн веськӧдлысь Василий Смалий.
Коми Республикаса Юралысь Сергей Гапликов петкӧдчис «Сӧвмӧдӧмлӧн Воркутаса опорнӧй зона йылысь» тыръюӧрӧн. Сы серти, Воркутаса опорнӧй зоналӧн эм некымын тӧдчанатор, медым лоны Арктика сӧвмӧдан шӧринъяс пиын ӧтиӧн.
Коми Республикаса Каналан Сӧветӧн Веськӧдлысь Надежда Дорофеева пасйис, мый дінмуса юралысь бура пасйис Воркуталысь тӧдчанлунсӧ – бур геополитическӧй положение, а сідзжӧ аслыспӧлӧс вӧр-ва да мупытшса озырлун, сы лыдын зарни, эзысь, ыргӧн, барит, свинеч, цинк, кварц-каолиновӧй сырьё да мукӧдтор.
Коми Республикаса Юралысь торйӧн пасйис, медым водзӧ сӧвмӧдны Воркутаса опорнӧй зона колӧ збыльмӧдны некымын стратегия мог. На пиын - «Сыктывкар - Нарьян-Мар» туй стрӧитӧм, аэропорт комплекс выльмӧдӧм, выль изшом перъянінъяс восьтӧм, уджалысь йӧзлы бур олан условиеяс лӧсьӧдӧм да мукӧдтор.
Ненеч асшӧрлуна кытшса юралысьлысь удж вӧчысь Александр Цыбульский нӧшта висьталіс мувывса транспорт сӧвмӧдӧм йылысь. Шуам, Индига порт, йитасны кӧрт туй отсӧгӧн Сосногорскӧд да тайӧ сетас позянлун нуны ресурсъяс Уралӧ да Казахстанӧ.
Надежда Дорофеева серти, тайӧ туйвизьӧд воськовъяссӧ нин вӧчӧны. «Сыктывкар - Нарьян-Мар» туй вуджӧдасны федеральнӧй эмбурӧ. Та йылысь колян вежоннас юӧртіс республикасянь Россия Федерацияса Канму Думалӧн депутат Ольга Савастьянова», - пасйис спикер.
Форум уджаліс ӧшым тӧлысь 5 лунӧ. Муніс «Арктикалон кад: полярнӧй дінму социальнӧя да экономика боксянь сӧвмӧдӧм» пленарнӧй заседание, сёрнияс кутасны мунны 12 уджалан сессия вылын, а помасяс ставыс «Кыдзи кыскыны роч Арктикаӧ туристъясӧс?» тема серти гӧгрӧс пызанӧн.
***Форум выло пасйысис 1600 участник, сы лыдын Россия Федерацияса Федеральнӧй Собраниелӧн кыкнан палатаӧс петкӧдлысьяс: Канму Думалӧн депутатъяс да Федерация Сӧветӧ пырысьяс, а сідзжӧ дінмуясӧс, ӧтйӧза котыръясӧс петкӧдлысьяс, Артика тема серти уджалысь туялысьяс.
