Рака тӧлысь 21 лунӧ Коми Республикаса Каналан Сӧветлӧн комитетъяслӧн заседаниеяс вылын депутатъяс видлалісны «Торъя категорияа гражданалы пособиеяс урчитӧмкӧд да мынтӧмкӧд йитчӧм ӧткымын юалӧм йылысь» республиканскӧй оланпасӧ стӧчмӧдӧмъяс.

Кыдзи юӧртіс Коми Республикаса Каналан Сӧветӧн Веськӧдлысьӧс вежысь  Валентина Жиделева, вежсьӧмъяс пыртӧм йитчӧма 2017 воын ӧшым тӧлысь 28 лунӧ «Челядя семьяяслы быдтӧлысся мынтӧмъяс йылысь» федеральнӧй оланпас вынсялӧмкӧд.

«Коми Республика ас вылас босьтас Россия Федерацияӧн сетӧм медводдза кага чужигӧн быдтӧлысся мынтӧм урчитӧм да сьӧмӧн могмӧдӧм кузя уджмогъяс. Лӧсялана вежсьӧмъяс пыртасны дінмуса оланпастэчасӧ. Быд тӧлысь кутасны сетны 12 487 шайт. 2018 вося рака тӧлысь 15 лун вылӧ 87 том семья сетісны нин шыӧдчӧмъяс», –  висьталіс Валентина Жиделева.

Казьтыштам, «Челядя семьяяслы быдтӧлысся мынтӧмъяс йылысь» федеральнӧй оланпас урчитіс 2018 вося тӧвшӧр тӧлысь 1 лунсянь выль сьома мынтӧм – медводдза кага чужигӧн (пи пыдди босьтігӧн) быдтӧлысся мынтӧм.

Сійӧс вермасны босьтны Россияса граждана, кодъяс пыр олӧны странаын да налӧн кӧ кагаыс чужис (пи пыдди босьтісны) 2018 вося тӧвшӧр тӧлысь 1 лун бӧрын да сійӧ Россия Федерацияса гражданин. Нӧшта быть колана условие –  семьялӧн ӧти морт вылӧ чӧжӧсыс оз вермы лоны унджык Россия Федерацияса субъектын уджалысьяслы урчитӧм овны судзсяна сьӧмлӧн 1,5 пӧв.

2017 вося мӧд кварталын Коми Республикаын  уджалысьяслы урчитӧм овны судзсяна сьӧмыс 13 276 шайт. Сідзкӧ 1,5 овны судзсяна сьӧмыс лоас 19 914 шайт.

Сьӧмсӧ урчитӧны ӧти во вылӧ. Тайӧ кадколаст борын ковмас нӧшта сетны выль шыӧдчӧм да став колана документ, медым кагалӧн во да джынйӧдз мынтісны тайӧ сьӧмсӧ.

Мынтӧмлӧн ыдждаыс лоас кольӧм вося мӧд кварталын Россия Федерацияса субъектын кагалы урчитӧм овны судзсяна сьӧм мында.