Талун дінмуса парламентын медуна депутатыс Ухтаысь, 25 пиын квайтыс ухтасаяс. Неважӧн карса Сӧветлӧн кык депутат Андрей Пулькин да Вячеслав Завальнев пырисны Том оланпас пыртысьяслӧн палатаӧ да республика тшупӧдын кутасны дорйыны Ухталысь интересъяс. Таӧн колӧ тырвыйӧ вӧдитчыны. Та йылысь висьталіс дінмуса парламентлӧн спикер Надежда Дорофеева «Ухта» КК МЮ Сӧветлӧн депутатъяскӧд  рака тӧлысь 15 лунӧ паныдасьлігӧн.

КР медшӧр сьӧма документ йылысь сёрнитігӧн  сійӧ пасйис, мый  республика вермис кыскыны федеральнӧй сьӧмкудйысь уна сьӧм. Тані ӧтув уджалісны республикаса Юралысьлӧн котыр, Коми Веськӧдлан котыр да Федеральнӧй Собраниеын дінмуӧс петкӧдлысьяс. Комилӧн сьӧмкудйыс важ моз социальнӧй.

«Ми пыр уджалам сы вылын, медым кыскыны федеральнӧй сьӧм. Тайӧ сетӧ позянлун кыпӧдны выль школаяя, культура да дзоньвидзалун видзан учреждениеяс. Кӧсъя тӧдчӧдны, мый ми виччысям муниципальнӧй юкӧнъяссянь водзмӧстчӧм. Карса да районса сӧветъяслӧн эм татшӧм инӧд да сыӧн колӧ вӧдитчыны. Но тшӧкыдджыка миян дорӧ шыӧдчӧны граждана. Колян воын гражданалӧн 10 вӧзйӧм тӧд вылӧ босьтісны  нормативнӧй инӧда актъяс дасьтігӧн, а МЮ Сӧветъяссянь водзмӧстчӧмыс абу», - тӧдчӧдіс республикаса Каналан Сӧветӧн Веськӧдлысь.

Нӧшта сійӧ пасйис, мый Ухта збыльмӧдіс Россияса Президентлысь медся тӧдчана мог – 100 прӧчент мында могмӧдіс кык тӧлыссянь куим арӧсӧдз кагаӧс школаӧдз велӧдӧмӧн. Но республикаын колӧ лӧсьӧдны яслиын сюрс да джын места, та вылӧ Комилы сетасны 290 млн. шайт. Кӧсйӧны кыпӧдны квайт выль школаӧдз велӧданін, дінму кутас выльмӧдны да ньӧбны лӧсялана жыръяс ясли улӧ.

Надежда Дорофеева РФ Каналан Думалӧн контроль да уджаланарт комитетӧн веськӧдлысь Ольга Савастьяновакӧд да аслас уджъёртъяс Екатерина Руденкокӧд да Игорь Завальневкӧд участвуйтіс бать-мамлӧн ставкарса чукӧртчӧмын, кутшӧм муніс Ухтаса культура дворечын.

Тані Надежда Дорофеева пасйис, мый республика водзын сулалӧ нӧшта ыджыд мог – мынтӧдчыны мӧд сменаысь. Талун 343 школа пиын 44-ын велӧдчӧны кыкы сменаӧ. На пиын унджыкыс карса школаяс, ставнас Комиын мӧд сменаын велӧдчӧ 10 сюрс кага. Локтан куим воын Комиын федеральнӧй сьӧм кыскӧмӧн кыпӧдасны кӧкъямыс школа.

«Тайӧ лыддьӧгын Ухта абу, тайӧ миянӧс майшӧдлӧ. Тані мӧд сменаӧ велӧдчӧ 12% да ми гӧгӧрвоам, мый выль школаыс колӧ. Та вӧсна велӧдӧмын инфраструктура сӧвмӧдан стратегия картаын урчитӧма кыпӧдны Ухтаын 1000 места вылӧ школа», - висьталіс Надежда Дорофеева.

Нӧшта сійӧ юӧртіс, мый «Газпром» ПАК да КР Веськӧдлан котыр костын сёрнитчӧмын сетны 500 млн. шайт  Г.А. Карчевский нима творчество шӧрин выльмӧдӧм выло.

«Ме тӧда тіян Челядь парклысь сӧвмӧм, мыйта тані вӧлі аттракцион! Сійӧ вӧлі Сӧветскӧй Союзса Войвылын медбур паркӧн! Став вын пуктам, медым бергӧдны сылысь славасӧ. Кутам ӧтув зільны», - пасйис спикер.

Ухтаӧ удж кузя ветлӧм кывкӧрталігӧн Надежда Дорофеева пасйис, мый татшӧм паныдасьлӧмъяс, кытчӧ пырӧдчӧны куим тшупӧда депутатъяс, колӧ тшӧкыдджыка нуӧдны да кыскыны муниципальнӧй депутатъясӧс оланпас пыртан уджӧ. Татшӧм водзмӧстчӧмъяс вермасны веськавны медвылыс тшупӧдӧдз – Россия Федерацияса Федеральнӧй Собраниеӧдз.