Рака тӧлысь 20 лунӧ Коми Республикаса Каналан Сӧветлӧн Президиумса заседание вылын республиканскӧй парламентлӧн депутатъяс видлалісны Коми Республика мутасын «Йӧзкостса сьӧмкуд» проектлысь мероприятиеяс збыльмӧдӧм. 

Кыдзи пасйис Коми Республикаса Каналан Сӧветӧн Веськӧдлысь  Надежда Дорофеева, 2017 вося кывкӧртӧдъяс серти Коми Республика пырис 15 дінму лыдӧ, кӧні бура сӧвмӧдісны водзмӧстчана бюджетирование.

«Лыддя, мый вӧчӧм уджсӧ вылӧ донъялісны. «Йӧзкостса сьӧмкуд» проект веськыда инмис пӧшти 400 сюрс мортлы – тайӧ республикалӧн джын олысьыс. Кӧсъя пасйыны, мый Коми Республикаса Каналан Сӧвет кутас корны2019 во вылӧ содтыны сьӧм», – пасйис Надежда Дорофеева.

Коми Республикаса Администрациялӧн мутасъяс сӧвмӧдан веськӧдланінса начальник Виктор Шевцов серти, 2017 воын сьӧмсӧ урчитісны 41,6 млн. шайт мында. Сьӧмыс муніс Коми Республикалӧн 8 канму уджтасысь. Содтӧд сьӧм вичмис муниципальнӧй юкӧнъяслӧн, юридическӧй предприятиеяслӧн да ас вылӧ уджалысьяслӧн сьӧмкудъясысь. Ставнас 2017 воын проектлы сетісны 58,7 млн. шайт.

2018 воын Коми Республикаын пӧртасны олӧмӧ 125 йӧзкостса проект 50 млн. шайт вылӧ. Найӧ инмасны 99 оланінлы да помасясны 2018 вося йирым тӧлысь 1 лунӧдз.

Муниципальнӧй юконъясӧс петкӧдлысьяс серти, «Йӧзкостса сьӧмкуд» проект зэв коланатор. Кыдзи висьталіс Сыктыв районса администрацияӧн юрнуӧдысь Роман Носков, 2017 воын муниципалитетын збыльмӧдісны культура, спорт, йӧзӧс уджӧн могмӧдӧм, мутас бурмӧдӧм да велӧдӧм юкӧнъясын 6 йӧзкостса проект 2 млн. шайт вылӧ. 2018 воын кӧсйӧны пӧртны олӧмӧ 10 проект.

Сыктывдін районын 2017 воын збыльмӧдісны йӧзӧс уджӧн могмӧдӧм, туй, мутас бурмӧдӧм, культура, а сідзжӧ ичӧт да шӧр предпринимательство юкӧнъясын 15 йӧзкостса проект 4,5 млн. шайт вылӧ. 2018 воын кӧсйӧны пӧртны олӧмӧ нӧшта 7 йӧзкостса проект.

Депутатъяс сюся кывзісны юӧрсӧ да шуисны бурмӧдны «Йӧзкостса сьӧмкуд» проект збыльмӧдӧм. Сьӧмкуд, вот да экономическӧй политика комитетӧн веськӧдлысь Степан Чураков серти, проектӧ пырысьяслы колӧ отсавны методика да котыртӧм боксянь.

«Ми аддзам, мый 2018 воын гражданалӧн 422 водзмӧстчӧмысь бӧрйӧмын участвуйтны лэдзисны 169. Уна проект киритісны министерствояс да ведомствояс тшупӧдын. Ёнджыкасӧ тайӧ йитчӧма документъяс дасьтӧмкӧд. Та вӧсна колӧ содтӧд велӧдны проектын участвуйтысьясӧс», – тӧдчӧдіс Чураков.

Нӧшта Президиум дырйи  депутатъяс видлалісны рака тӧлысь 22 лунся Коми Республикаса Каналан Сӧветлӧн локтан заседаниелысь сёрнитантор. Ставнас парламентарийяслы ковмас видлавны 22 юалӧм.