Выльторъяс
Каналан Сӧветлӧн VI сессияса II заседание вылын депутатъяс видлалісны 20-ысь унджык юалӧм
Рака тӧлысь 22 лунӧ муніс Коми Республикаса Каналан Сӧветлӧн VI сессияса II заседание. Республиканскӧй парламентлӧн депутатъяс видлалісны 23 юалӧм.
Пыртісны вежсьӧмъяс «Коми Республикаын административнӧй кывкутӧм йылысь», «Коми Республикаса Каналан Сӧветлӧн депутатлӧн статус йылысь», «Коми Республикаын гражданалысь шыӧдчан инӧд збыльмӧдӧм йылысь», «Торъя категорияа гражданалы пособиеяс урчитӧмкӧд да мынтӧмкӧд йитчӧм ӧткымын юалӧм йылысь» да мукӧд республиканскӧй оланпасӧ.
Та кындзи, парламентарийяс Оланпастэчас да меставывса асвеськӧдлан комитетӧн веськӧдлысьнас бӧрйисны депутат Геннадий Горбачевӧс. Социальнӧй политика комитетӧн кутас юрнуӧдны депутат Сергей Артеев. Сьӧмкуд, вот да экономическӧй политика комитетӧ пыртісны депутат Александр Пономаревӧс.
Нӧшта парламентарийяс видлалісны «Коми Республика да Ханты-Мансийск асшӧрлуна кытш – Югра костын мудоръяс опишитӧм йылысь артмӧдчӧм кырымалӧм вынсьӧдӧм йылысь» оланпас бала.
Сёрнитантор ӧтдор муніс «правительственнӧй час». Депутатъяс кывзісны Коми Республикаын пытшкӧс делӧяс министр Виктор Половниковлысь 2017 воын министерстволӧн удж йылысь отчёт.
Республиканскӧй парламентлӧн локтан заседаниеыс мунас 2018 вося косму тӧлысь 19 лунӧ.
