Рака тӧлысь 28 лунӧ Коми Республикаса Каналан Сӧветын муніс «гӧгрӧс пызан», кӧні видлалісны «Кӧр видзӧм йылысь» республиканскӧй оланпас збыльмӧдігӧн кӧр йирӧданінъясӧн вӧдитчӧм.

Мероприятиеын участвуйтісны республиканскӧй парламентлӧн депутатъяс, олӧмӧ пӧртысь власьт органъясӧс, метсавывса асвеськӧдлан органъясӧс, видз-му овмӧсса  предприятиеясӧс, а сідзжӧ ӧтйӧза да наука организацияясӧс петкӧдлысьяс.

Паныдасьлӧм восьтігӧн Коми Республикаса Каналан Сӧветӧн Веськӧдлысь Надежда Дорофеева тӧдчӧдіс, мый сизим во сайын Коми Республикаын вынсьӧдісны «Кӧр видзӧм йылысь» республиканскӧй оланпас. Сэки жӧ вынсьӧдісны «Коми Республикаын кӧр видзӧм сӧвмӧдӧм» дыр кадся торъя мога уджтас.

«Гашкӧ, оланпаслысь ӧткымын положениесӧ колӧ талун бурмӧдны. Тӧда, мый тайӧ оланпаслысь ӧткымын статьясӧ сьӧкыд збыльмӧдны. Кӧр видзан овмӧсъяслы медся тӧдчана юалӧмыс йитчӧма муяс вӧдитчӧмкӧд. Тӧдчӧда, мый талун медшӧр могыс разьны тайӧ мытшӧдъяссӧ», - висьталіс Надежда Дорофеева.

Вӧр-ва озырлун, вӧр-ваӧн вӧдитчан да экология комитетӧн веськӧдлысь Василий Смалий казьтыштіс, мый бӧръя кадӧ федеральнӧй тшупӧдын сёрнитӧны Россия Федерацияса арктика зона зіля сӧвмӧдӧм да лӧсялана федеральнӧй оланпас лӧсьӧдӧм йылысь.

«Уджыс бур. Но миянлы колӧ тӧд вылын кутны арктика мутас, кӧні ыджыд пайыс кӧр йирӧданінъяс улын,  бурӧн вӧдитчӧм. Та вӧсна ми лыддям, мый колӧ талун видлавны республикаын кӧр видзӧм да кӧр йирӧданінъясӧн вӧдитчӧм, разьны республика тшупӧдын либӧ канму власьт федеральнӧй органъясӧ шыӧдчӧмӧн мытшӧдъяс», – висьталіс Василий Смалий.

Коми Республикаса видз-му овмӧс да потребительскӧй рынок министрӧс вежысь Александр Полугрудов серти, Коми Республикаын кӧр видзӧны вит видз-му овмӧсса организация –«Оленевод» ПСК, «Северный» ИКК, «Инта Приполярная» агрокомплекс» ИКК, «Абезь» ИКК да «Петруньское» ИКК, а сідзжӧ Инта районын 4 крестьянско-фермерскӧй овмӧс. 2018 вося тӧвшӧр тӧлысь 1 лун вылӧ овмӧсъясын видзӧны 93 сюрс кӧр. Организацияясын уджалӧны 300 морт, сы лыдын кӧр видзысьяслӧн семьяяс. Докладчик серти, дінмуын кӧр видзӧм сӧвмӧдӧмын медтӧдчанаӧн лоӧ муяс да сёян турун.

Республикаын кӧр йирӧданінъяслӧн ыдждаыс 9,5 млн. гектар. На пиын 84 %-ыс меститчӧма вӧр фондын, колясыс (1,1 млн. га) видз-му овмӧсса муяс. Но йирӧданінъясӧн вӧдитчигӧн кӧр видзысьяслӧн кыптӧны мытшӧдъяс.

Сідз, унджык кӧр видзан овмӧсыс абу кырымалӧма мутасъяс кӧртымалан сёрнитчӧмъяс. Тайӧ артмис некымын помка вӧсна: уна пӧвса реорганизация, а сідзжӧ му да вӧр оланпастэчасын вежсьӧмъяс.

Коми Республикаса вӧр-ва озырлун да гӧгӧртас видзан  министерстволӧн юӧр серти, медым вӧр фондса муяс индыны кадастр учётӧ, колӧ содтӧд 14,5 млн. шайт. 2019 во да мунан вояс вылӧ сьӧмкуд дасьтігӧн  министерство кутас урчитны тайӧ уджъяс вылӧ сьӧм.

Та кындзи, республикаын колӧ туявны йирӧданінъяслысь оленеёмкосьт, та вылӧ колӧ 33 млн. шайт.

Заседание вылын нӧшта видлалісны вӧрса кӧр видзӧм да тундраын перъян компанияясӧн муясӧн вӧдитчӧм вӧсна йирӧданінъяс видзӧм.

«Гӧгрӧс пызан» помын вынсьӧдісны Коми Республикаса Каналан Сӧветлы да дінмуса Веськӧдлан котырлы вӧзйӧмъяслысь бала, мыйӧн вӧзйӧны бурмӧдны кӧр видзӧм кузя оланпастэчас.