Россия Федерацияса Федеральнӧй Собрание бердын Оланпас пыртысьяслӧн сӧветлӧн велӧдӧм да наука комиссияса заседание вылын видлалісны уна сикас юкӧнлы да цифрӧвӧй экономикалы  кадръяс дасьтӧм. Заседаниеыс муніс косму тӧлысь 5 лунӧ Томск карын. Коми Республикаса Каналан Сӧветсянь форум вылын вӧлісны парламентса спикер Надежда Дорофеева да сійӧс вежысь Валентина Жиделева.

«Миян республикаын цифрӧвӧй технологияяс сӧвмӧдӧмын медтӧдчанаӧн лоӧ кадрӧвӧй да проектнӧй веськӧдлӧмын могъяс. Комиын збыльмӧдӧны проектӧн веськӧдлӧм, вӧдитчӧны лӧсялана юӧртан платформаӧн. Выль решение лӧсьӧдӧм да збыльмӧдӧм – тайӧ пыр аслыспӧлӧс проект, татшӧмтор пыртӧны ведомствояслӧн уджӧ, кодъяс кывкутӧны дінмуын информатизацияысь. Кыдзи и мукӧд дінмулӧн, миян могыс йитчӧма юӧртан технологияяс юкӧнын специалистъясӧс «ӧти туйвизьӧд» велӧдӧм. Ми «быдтам» техническӧй кадръясӧс, но тырвыйӧ огӧ велӧдӧй веськӧдлысьясӧс – ИТ-менеджеръясӧс», - пасйис Надежда Дорофеева, коді пырӧ Оланпас пыртысьяслӧн сӧветлӧн велӧдӧм да наука комиссияӧ.

Тайо туйвизьын республика мунӧ нин водзӧ. Велӧдӧм сӧвмӧдан Коми республиканскӧй институт дасьтіс содтӧд уджсикас уджтасъяс. Выль велӧдчан восянь Комиын дасьтӧны ТОП-50 лыддьӧгса туйвизьяс серти – «Сетевӧй да системнӧй администрирование», «Юӧртан системаяс да программирование».

Велӧдчысьяс пиын эмӧсь нин шедӧдӧмъяс. «Кванториум» челядьлы технопаркын велӧдӧны «Том информатик» да «Робототехника» уджтасъяс серти, И.А. Куратов нима Сыктывкарса гуманитарно-педагогическӧй колледж бердын лӧсьӧдӧма «Велӧдан робототехника да том йӧзлысь техническӧй творчество сӧвмӧдан дінмуса ресурснӧй шӧрин». «Гӧгыль» команда, кытчӧ пырӧны Захар Григорьев да Роман Есев, вермис ставроссияса «РобоФест-2017»  «Агро-туялысьяс» номинацияын.

Республикаса школаясын роботехника пыртӧма бӧръян уджтасъяс лыдӧ. Кольӧм воын «ИКаР» дінмуса  ордйысьӧмъясӧ пырӧдчис сизим команда, локтан турнирын лоас ёна унджык.

Кольӧм вося арын Сыктывкарын восьтісны «Кванториум» челядьлы велӧдан шӧрин. Тані уджалӧ Россияын дзик ӧти дорйӧм «Медиа-квантум». Тайӧ выль иммерсивнӧй журналистикалӧн туйвизь, мый дасьтӧ «быттьӧ вӧлӧм» медиапроуктъяс. «Медиквантум» мӧд ног шуӧны «Лоны вермана да содтана олӧм». Тані эмӧсь теле- да фотостудияяс, а оборудованиеыс бурджык меставывса телеканалъяс дорысь.

Аскиа журналистъяс дасьтӧны выльторъяс, ордйысьӧмъяс вылысь репортажъяс, быдӧн вермӧ пуктыны асьсӧ режиссёр либо телезвезда туйӧ. Том медийщикъяс  висьталӧны спорт да туризм шӧрин, экология шӧрин да РЦДО удж йылысь. Транслируйтӧм кузя мытшӧдыс абу, талун позьӧ ставсӧ йӧзӧдны социальнӧй везъясын либӧ Ютубын.

Комиссияслӧн заседаниелысь удж кывкӧрталігӧн Коми парламентса спикер висьталіс цифрӧвӧй экономика сӧвмӧдӧмын медёсь мытшӧдъяс йылысь.

Сӧвмӧдӧм торкӧ юӧртан да телекоммуникационнӧй технологияяс пыртӧм да вешйыны вермӧм вылӧ ыджыд рӧскодъяс, юӧр доръян сертифицируйтӧм средствояслӧн абутӧм да IT-технологияяс юкӧнын, сы лыдын юӧр дорйӧмын, кадръяс тырмытӧм.

Медся ёсь мытшӧдъяс разьӧм могысь Надежда Дорофеева вӧзйис лӧсьӧдны Россия Федерацияса Веськӧдлан котыр тшупӧдын юӧртан да телекоммуникационнӧй технологияяс юкӧнын нормативнӧй да инӧда актъяс кузя дінмуясын медбур уджлысь реестр. Тайӧ отсалас дасьтыны да вынсьӧдны инӧда актъяс. Татшӧм вӧзйӧмъяс видлалӧмсӧ дінмуяслы вӧзйисны вӧчны тыдаланаӧн.

«Дінмуяслы цифрӧвӧй экономика сӧвмӧдӧмын да йӧзӧс югдӧдана удж котыртӧмын ыджыд отсӧг сетасны грантъяс. Эскам, мый миянлысь вӧзйӧмсӧ пӧртасны олӧмӧ», - пасйис Надежда Дорофеева.

Тайӧ тема серти сёрниыс водзӧ мунас Россия Федерацияса Федеральнӧй Собрание бердын Оланпас пыртысьяслӧн сӧветлӧн заседание вылын.