Косму тӧлысь 9 лунӧ Коми Республикаса Каналан Сӧветын чукӧртчывліс Коми Республикаса канму власьт оланпас пыртан органлы 80-во кежлӧ дасьтысьӧм кузя оргкомитет. Сэні видлалісны тшупӧда паслы сиӧм мероприятиеяс.

Заседаниеын участвуйтіс Коми Республикаса Каналан Сӧветӧн Веськӧдлысь Надежда Дорофеева, Коми Республикаса культура министр Сергей Емельянов, Коми Республикаса Каналан Сӧветын Коми Республикаса Юралысьӧс пыр петкӧдлысь Дмитрий Толстов, а сідзжӧ республиканскӧй парламентса аппаратын уджалысьяс, Коми Республикаса национальнӧй музейӧс да Канму службаӧ да веськӧдлыны велӧдан Коми республиканскӧй академияӧс петкӧдлысьяс.

«Мероприятиеяслӧн медшӧр могыс – йӧзӧс югдӧдана удж. Оланпас пыртан органлӧн историяыс  топыда йитчӧма Коми мулӧн историякӧд. Йӧзӧн бӧрйӧмаяс пыр вӧліны медтӧдчана лоӧмторъяс пытшкын, вынсьӧдісны йӧзлӧн олӧмлы инмана решениеяс. Казьтыштам татшӧм йӧзӧс, кыдзи Юрий Алексеевич Спиридонов, Иван Егорович Кулаков, Ирина Кирилловна Устинова. Жаль, мый найо абуӧсь миян костын», – пасйис Надежда Дорофеева.

Кыдзи висьталіс Коми Каналан Сӧветӧн Веськӧдлысь, лӧддза-номъя тӧлысь 26 лунся кыпыд заседание вылӧ корасны Вылыс Сӧветса да Каналан Сӧветса депутатъясӧс. «Зэв нимкодь, мый ветеранъяс оз вунӧдны Коми Каналан Сӧвет, отсалӧны депутатъяслы велӧдӧмъясӧн да туйдӧдӧмъясӧн. Колян вежонын Коми Каналан Сӧветӧ волісны Коми АССР-са Медвылыс Сӧветлӧн Президиумӧн Веськӧдлысь, РСФСР-са йӧзкостса депутат Юрий Иванович Семуков да Коми АССР-са Медвылыс Сӧветӧн Веськӧдлысьӧс вежысь Валерий Андреевич Потолицын. Юксисны казьтывлӧмъясӧн, талунъя парламентлӧн удж кузя видзӧдласӧн. Республиканскӧй газетъяслӧн локтан номеръясын петас накӧд сёрни», – висьталіс Надежда Дорофеева.

2018 воын шуӧма нуӧдны 20-ысь унджык мероприятие, кутшӧмӧс сиасны Коми Республикаса оланпас пыртан органлы 80 во тырӧмлы.

Кыдзи юортіс Коми Республикаса культура министр Сергей Емельянов, республикаса библиотекаясын лӧсьӧдасны небӧгъясысь выставкаяс, а музейясын – недыр кадся экспозицияяс, кутшӧмӧс сиасны Коми парламентлы 80 во тырӧмлы. Сідз, С.Я. Маршак нима Коми Республикаса челядьлы библиотека дасьтӧ «Страницы нашей истории» выставка, Луи Брайль нима синтомаяслы торъя библиотека –«Развитие народовластия в Республике Коми» выставка, Коми Республикаса национальнӧй библиотека – «Именем закона» выставка. Томуловлы республиканскӧй библиотекаын позяс тӧдмасьны «Законодательная власть: очерки истории» выставкаӧн.

Коми Республикаса национальнӧй музейлӧн история юкӧнын восьтасны «У истоков зырянского парламентаризма» экспозиция. Муниципальнӧй музейяс да библиотекаяс тшӧтш пырӧдчасны тшупӧда пас пасйӧмӧ.

2018 воын нуӧдасны «Время парламента» СМИ-ын журналистлӧн медбур материал вылӧ конкурс, кутшӧмӧс сиасны Коми Республикаса оланпас пыртан органлы 80 во тырӧмлы, а сідзжӧ «Роль регионального парламента в развитии политической системы» тема серти вузъясса студентъяс костын эссе конкурс.

Тшупӧда пас кежлӧ лэдзасны «Народные избранники. Верховный Совет Коми АССР – Государственный Совет Республики Коми. 1938 – 2018» небӧглысь коймӧд (содтӧм) петас. Велӧдчанінъясын велӧдчысьяслы республиканскӧй парламентын нуӧдасны «Восьса ӧдзӧсъяслысь лунъяс». 

2018 вося лӧддза-номъя тӧлысь 26 лунӧ мунас Коми Республикаса Каналан Сӧветлӧн кыпыд заседание, кутшӧмӧс сиасны оланпас пыртан органлы 80 во тырӧмлы.