Косму тӧлысь 10 лунӧ Коми Республикаса Каналан Сӧветлӧн Президиум вылын депутатъяс видлалісны да вынсьӧдісны косму тӧлысь 19 лунӧ Каналан Сӧветлӧн сессияса заседаниелысь сёрнитантор.

Кыдзи пасйис Каналан Сӧветӧн Веськӧдлысь Надежда Дорофеева, локтан заседаниелӧн медшӧрнас лоас Коми Республикаса Юралысьлӧн 2017 воын Коми Республикаса Веськӧдлан котырлӧн удж йылысь тыръюӧр.

Заседаниелӧн сёрнитанторйӧ пыртісны оланпас бала, кутшӧм инмӧ Вылыс Мыртыю посёлокын олысьяслы.

«Оланпас разяс важ мытшӧд. Ӧд административнӧя Вылыс Мыртыю посёлок пырӧ Сыктывкарӧ, а мутас серти – Сыктывдін районӧ. Та вӧсна артмис сідзи, мый ӧти юалӧмъясысь кывкутіс кар, а мӧдъясысь район. Ме вӧлі гражданалӧн чукӧртчӧм вылын, кутшӧм муніс 2015 вося моз тӧлысьын. Сэки нин кыпӧдісны мытшӧдъяс транспортӧн ветлӧысь дон серти, муяс оформитӧмкӧд да мукӧд. Та вӧсна Мыртыюын олысьяс ӧтсӧгласӧн  шуисны пырны Сыктывкарӧ», – висьталіс Надежда Дорофеева.

Коми Каналан Сӧветлӧн сессияса заседание мунас косму тӧлысь 19 лунӧ, ставнас сёрнитанторйӧ пыртӧма 11 юалӧм.