Косму тӧлысь 11 лунӧ Коми Республикаса Каналан Сӧветын муніс видеоконференция, кӧні видлалісны Коми Республикаын муниципальнӧй юкӧнъяслӧн мутасъясын старӧстаяслысь удж.

Мероприятиеын участвуйтісны 180 морт. На пиын Коми Республикаса Каналан Сӧветлӧн депутатъяс, муниципальнӧй юкӧнъясӧс, Коми Республикаса прокуратураӧс да Коми Республикаса видзӧдан-арталан палатаӧс петкӧдлысьяс.

Участникъяс дорӧ шыӧдчӧмын Коми Каналан Сӧветӧн Веськӧдлысь Надежда Дорофеева пасйис, мый старӧстаяс зэв ёна колӧны, медым дорйыны сиктса олысьяслысь кӧсйӧмъяс.

«Старӧстаясӧн бӧрйӧны найӧс, кодъяслы эскӧны, пыдди пуктӧны, кодъяс дасьӧсь мунны быд тшупӧда власьт дорӧ олысьяслысь мытшӧдъяс разьӧм могысь. Старӧста йитӧ власьтӧс да олысьясӧс да дась сьӧлӧмсянь уджавны», – пасйис дінмуса парламентлӧн спикер.

Кыдзи висьталіс Коми Республикаса Администрациялӧн мутасъяс сӧвмӧдан веськӧдланінса начальникӧс вежысь – аналитика юкӧнса начальник Марина Козлова, республикаын бӧрйӧма  18 муниципальнӧй юкӧнын 198 старӧста. 2017 воын старӧстаяс котыртісны уна йӧза культура мероприятиеяс да социальнӧй акцияяс, бурмӧдісны мутасъяс. Овмӧдчӧминса старӧстаяс дасьтісны олан пунктъяс ытва дорӧ. Та кындзи, старӧстаяс отсалісны эрдӧдны социальнӧй юалӧмъяс, сы лыдын инфраструктура видзӧм да уджӧдӧм кузя юалӧмъяс. Нӧшта старӧстаяс зіля пырӧдчисны «Йӧзкостса сьӧмкуд» дінмуса проект збыльмӧдӧмӧ.

Сёрнитысь серти, старӧстаяс лоисны меставывса власьтлы збыль отсасьысьясӧн. 146 старӧста уджалӧны сьӧкыда воӧдчана оланінъясын. Талун уна муниципалитетын абу ладмӧдӧма старӧстаяслы сьӧма отсӧг, а сідзжӧ удж вӧчигӧн артмӧм рӧскодъяс вештӧм.

Старӧстаяслӧн удж йылысь висьталісны «Вуктыл» кар кытшса муниципальнӧй юкӧнлӧн администрацияса мутасъяскӧд удж секторӧн веськӧдлысь Маргарита Геревич, Сыктывдін районса Зеленеч сиктса юралысь Владимир Козлов, Чилимдін районса Трусов сиктса юралысь Елена Дуркина, а сідзжӧ Трусов сиктса овмӧдчӧминса Мыла грездса старӧста Игорь Бобрецов.

«Коми Республикалӧн эм старӧстаяскӧд уджлӧн опыт, эмӧсь вермӧмъяс да шедӧдӧмторъяс, - кывкӧрталіс Коми Республикаса Каналан Сӧветлӧн оланпастэчас да меставывса асвеськӧдлан комитетӧн веськӧдлысь Геннадий Горбачев. – Эска, мый тайӧ семинарыс бур ваяс став участниклы, а юӧрыс ковмас муниципальнӧй юкӧнъясӧс петкӧдлысьяслы да старӧстаяслы. Семинар вылын висьталісны уна колана вӧзйӧм, найӧс тырвыйӧ видлаласны».