Татшӧм решение вынсьӧдісны Коми Республикаса Каналан Сӧветлӧн Президиум вылын, мый муніс лӧддза-номъя тӧлысь 28 лунӧ. Медшӧр юалӧмнас лоис 2017 воын нормотворчествоын оланпаслун.

Коми Республикаса Прокурорлӧн старшӧй отсасьысь Зинаида Ивашина серти, 2017 воын дӧзьӧр ведомствоын туялӧма 929 нормативнӧй инӧда акт бала. 113-ыс воис Каналан Сӧветсянь да 816-ыс – олӧмӧ пӧртысь власьт органъяссянь. Экспертизаяс серти ӧткымын оланпас бала кузя дасьтісны лёк кывкӧртӧд. Тырмытӧмторъяс пиын ӧти – Россия Федерацияса федеральнӧй оланпасъясӧ да мукӧд нормативнӧй инӧда акт абу ас кадӧ туялӧм да пыртӧм вежсьӧмъяс арталӧм. Кыдзи казьтыштіс Зинаида Ивашина, дінмуса оланпастэчас федеральнӧйлы лӧсьӧдӧм вылӧ сетӧны куим тӧлысь.

Кыдзи пасйис Коми Республикаса Каналан Сӧветӧн Веськӧдлысьӧс вежысь Владимир Косов, коди нуӧдіс Президиумлысь заседаниесӧ, Каналан Сӧвет да республикаса Прокуратура костын тэчсис топыд удж.

«Ме кӧсъя аттьӧавны Зинаида Семеновнаӧс оланпастэчас бурмӧдан уджысь. Зэв тӧдчана юӧр талун висьталінныд, ми быть сійӧс босьтам тӧд вылӧ да бырӧдам тырмытӧмторъяс», – тӧдчӧдіс вице-спикер.

Нӧшта Президиумса заседание вылын вынсьӧдісны Коми Республикаса Каналан Сӧветлысь сора тӧлысь вылӧ уджалан план  да моз тӧлысь вылӧ водзвыв уджалан план.