Лӧддза-номъя тӧлысь 26 лунӧ муніс Коми Республикаса VI бӧрйӧм Каналан Сӧветлӧн VI сессияса IV заседание. Депутатъяс видлалісны 29 юалӧм, на пиын – 2017 воын республиканскӧй сьӧмкуд олӧмӧ пӧртӧм, 2018 воын да 2019 да 2020 воясся планӧвӧй кадколаст вылӧ республиканскӧй сьӧмкуд йылысь оланпасӧ вежсьӧмъяс пыртӧм, шоныд энергия вылӧ кокньӧда тарифъяс йылысь, оланін стрӧитӧм либӧ ньӧбӧм вылӧ социальнӧй мынтӧмъяс йылысь, гражданалысь дзоньвидзалун видзӧмын ӧткымын юалӧм йылысь оланпасъяс да мукӧд.

Та кындзи, парламентарийяс вынсьӧдісны «Вӧралӧм да вӧралан ресурсъяс видзӧм йылысь» республиканскӧй оланпас да 2017 воын Коми Республикаса видзӧдан-арталан палаталӧн удж йылысь отчёт.

Нӧшта депутатъяс гӧлӧсуйтісны, медым сетны «Почёта гражданин» Коми Республикаса почёт ним. Йӧзӧн бӧрйӧмаяс вынсьӧдісны вит  кандидатура – Россия Федерацияса Безопасносьт Федеральнӧй службалӧн Коми Республикаын Веськӧдланінса кадръясӧн веськӧдланінса начальник, подполковник, Россия Федерацияса герой Александр Алексеевӧс (кулӧм бӧрын), Кӧрткерӧс сиктса 5 №-а челядьӧс видзанінса воспитатель Надежда Елфимоваӧс, Воркутса администрациялӧн архитектура веськӧдланінса начальник, Россияса архитекторъяслӧн котырӧ пырысь Владимир Иващенкоӧс, Искусствояс школаса велӧдысь, «Аленький цветочек» республикаын медводдза балет театр котыртысь да веськӧдлысь Галина Ширяеваӧс да Выльгорт сиктса Художествоа ремеслӧ челядьлы школаса директор, Россияса йӧзкостса мастер Валерий Тороповӧс. Ним сетӧм кузя бӧръя решениесӧ вынсьӧдас Коми Республикаса Юралысь Сергей Гапликов.

Депутатъяс нӧшта бӧрйисны Коми Республикаса Каналан Сӧветлӧн Президиум лыдӧ депутат Олег Михайловӧс, а Республиканскӧй парламентлӧн оланін да коммунальнӧй овмӧслӧн пыр уджалысь комиссияӧ депутат Владимир Жариковӧс.

Коми Республикаса Каналан Сӧветлӧн локтан заседаниеыс мунас кӧч тӧлысь 20 лунӧ.