Выльторъяс

Коми Каналан Сӧветын муніс челядьлы небӧгъяслӧн да газет-журналлӧн республиканскӧй выставка

Кӧч тӧлысь 20 лунӧ Коми Республикаса Каналан Сӧветынм муніс челядьлы небӧгъяслӧн да газет-журналлӧн республиканскӧй выставка. Локтысьяс тӧдмасисны республикаын лэдзӧм челядьлы литератураӧн, а сідзжӧ вермисны отсавны районса да карса библиотекаяслы газет-журнал вылӧ найӧс гижӧдӧмӧн.

Кыдзи пасйис Коми Республикаса Каналан Сӧветӧн Веськӧдлысь Надежда Дорофеева, выставккалӧн могыс петкӧдлыны республикаын челядьлы литература сӧвмӧдӧм.

«Ми тайӧс вӧчам уджалан сӧвещание водзын, кӧні видлалам небӧг лэдзӧм да челядьлы газет-журнал лэдзӧм сӧвмӧдӧм, а сідзжӧ мытшӧдъяс. Тайӧ выставкалӧн выльыс сыын, мый талун Каналан Сӧветлӧн депутатъяс пырӧдчасны республикаса каръясын да районъясын меститчӧм библиотекаяслысь фондъяс озырмӧдӧм кузя акцияӧ. Быдӧн вермас ньӧбны торъя небӧг либӧ небӧг чукӧр, гижӧдчыны газет-журнал вылӧ. Сэсся небӧгъяссӧ сетасны библиотекаяслы. Чайта, мый медся нимкодь лоас школаяслы. Ӧд медбур козиныс – тайӧ небӧг», – висьталіс Надежда Дорофеева.

Выставка восьтігӧн аслас сьӧлӧмкылӧмъясӧн юксис Социальнӧй политика комитетӧн веськӧдлысь Сергей Артеев.

«Ми ставӧн казьтывлам челядьдыр. Тайӧ литератураыс быдтӧ-сӧвмӧдӧ челядьӧс, лӧсьӧдӧ налысь видзӧдлас. Эска, мый став тайӧ небӧгыс отсалас велӧдчысьяслы лоны бурджыкӧн», – пасйис Сергей Артеев.

«Небӧг – медбур ёрт и кык арӧса кагалы и 70 арӧса мортлы. Та вӧсна тӧдчӧда – мед олас коми небӧг!» – сьӧлӧмсяньыс висьталіс Коми Каналан Сӧветӧн Веськӧдлысьӧс вежысь Владимир Косов.

Выставка вылын петкӧдлісны Коми Республикаын лэдзӧм челядьлы газет-журнал да небӧгъяс: Коми йӧзӧдчан керкалысь да Коми республиканскӧй типографиялысь лэдзанторъяс, «Арт», «Чушканзі», «Радуга», «Би кинь» журналъяс, «Коми му» да «Йöлöга» газетъяс.