Выльторъяс

Россияын вермас лоны сиктса мутасъяс сӧвмӧдӧм кузя торъя национальнӧй проект

Та йылысь сёрнитісны Коми Республикаса Каналан Сӧветӧн Веськӧдлысь Надежда Дорофеева да РФ Федерацияса Сӧветӧ пырысь Дмитрий Шатохин Сыктывкарын удж кузя паныдасьлӧм вылын.

«Ми Тіянкӧд кутам топыд йитӧдъяс, но талун вӧзъя видлавны тайӧ темасӧ. Та йылысь сёрнисӧ кыпӧдӧны депутатъяс водзын быд муниципальнӧй юкӧнын. Ӧні уджалӧны быд тшупӧда сьӧмкудъяс вылын да миянлы колӧ тӧдны, кутшӧм вежсьӧмъяс вермасны лоны», - пасйис Надежда Дорофеева.

Коми парламентса спикер висьталіс сенаторля, мый республика мӧд во нин пырӧдчӧ  «Карын лӧсьыд олӧм вӧчӧм» федеральнӧй проектӧ. Колян воын бурмӧдісны сёысь унджык керка йӧз да унайӧзаин. Таво кӧсйӧны бурмӧдны 90 керка йӧр, 60 унайӧзаин да ӧти карса парк, та вылӧ урчитӧма  230 млн. шайт. Став уджсӧ помалӧны нин.

«Колян во помын ми тіянкӧд вӧлім Федеральнӧй Собраниеса вылыс палата бердын Меставывса асвеськӧдлӧм кузя сӧветлӧн заседание вылын. Сэні пасйисны, мый Коми бураа пӧртӧ олӧмӧ уджтаслысь юкӧнсӧ. Да сэки жӧ вӧзйисны, мый татшӧм проектыс колӧ олан пунктъясын, кӧні олӧ сюрсӧдз морт. Эмӧсь-ӧ кутшӧмкӧ вежсьӧмъяс федеральнӧй тшупӧдын?», - юасис Надежда Дорофеева.

Сійӧ пример пыдди вайӧдіс Кӧрткерӧс районса Додз сикт, кодлӧн администрацияыс дасьтіс документъяс, медым пырӧдчыны проектӧ, а Сикт овмӧдчӧминса сӧвет вынсьӧдіс  «2018-2022 вояс вылын «Додз» СО мутасын "Карын лӧсьыд олӧм вӧчӧм» муниципальнӧй уджтас. Но овмӧдчӧминлы отсӧгсӧ эз сетны, ӧд сэні олӧ 985 морт, а колана условие серти колӧ, медым оліс сюрсысь унджык морт.

Дмитрий Шатохин серти «Карын лӧсьыд олӧм вӧчӧм» зэв ладмӧдчан  проект. Водзынджык сэтчӧ пырӧдчисны сӧмын каръяс, то талун содісны гырысь сиктъяс. Комиын сенатор ветліс видзӧдлыны, кыдзи Помӧсдін сиктын пӧртӧны олӧмӧ проектсӧ. Сэні олӧ кык сюрс морт.

Та дырйи сійӧ лыддьӧ, мый проектӧ позьӧ пыртны олан пунктъяс, кӧні олӧны 500 сюрсысь этшаджык морт. Дмитрий Шатохин дась кыпӧдны тайӧ юалӧмсӧ федеральнӧй тшупӧдын, но уджавнысӧ колӧ ӧтув – КР Каналан  Сӧвет вӧзъяс сійӧс видлавны Россияса Рытыв-Войвыв Парламентса Ассоциациялӧн заседание вылын.

«Миянлы колӧ вӧзъяна бюджетирование кузя федеральнӧй уджтас либӧ «Сиктса мутасъяс зумыда сӧвмӧдӧм» торъя мога уджтаслӧн торъя уджтасув, кутшӧмсӧ эськӧ вӧлі сиӧма сиктъяс, посёлокъяс да грездъяс бурмӧдӧмлы. Талун каръяслы кокньыдджык ичӧт олан пунктъяс дорысь, кутшӧмъяслӧн лачаыс сӧмын «Йӧзкостса сьӧмкуд» вылӧ, - пасйис Дмитрий Шатохин.

Нӧшта сійӧ висьталіс, мый Россияса Веськӧдлан котырлӧн вице-премьер Алексей Гордеев, коді видзӧдӧ видз-му овмӧс бӧрся, вӧзйис лӧсьӧдны сиктса мутасъяс сӧвмӧдӧм кузя торъя национальнӧй проект. Талун тайӧ вӧзйӧмсӧ ыстӧмаӧсь профильса ведомствояслы.

«Водзмӧстчысь йӧзлӧн эмӧсь позянлунъяс, медым кыскыны сьӧм. Но колӧ панны ыджыд котыртан удж, а тайӧ оз быдӧнлӧн артмы. Колян воын  Россияын збыльмӧдӧма 14 сюрс проект. Тшӧкыда меставывса асвеськӧдлан органъяс кыскӧны тайӧ уджӧ некоммерческӧй фондъясӧс. Комиын тшӧкыдджыка сьӧм босьтӧны Президентса грантъяслон фондысь, Коми мутасса ӧтйӧза асвеськӧдлан органъяслӧн ассоциациялысь, Лукойллысь, мукӧд источникысь», - тӧдчӧдіс сенатор.

Сійӧ нӧшта пасйис, мый бӧръя кадӧ паськалӧ том йӧзлӧн инициативнӧй бюджетирование. Шуам, Сахалинын том йӧзӧс да весиг гырысь классъясын велӧдчысьясӧс торйӧн та вылӧ велӧдӧны, ӧд на сайын аскиалуныс, а став проектыс веськӧдӧма сӧвмӧдӧм вылӧ.

Надежда Дорофеева сӧгласитчис, мый тайӧ бур удж да кӧсйысис сёрнитны та серти уджъёртясыскӧд. Талун Сахалин медуна кыскӧ сьӧмсӧ инициативнӧй бюджетирование серти. Коми Республика тшӧтш содтӧ ӧдсӧ. 2019 воын кӧсйӧны содтыны «Йӧзкостса сьӧмкуд» вылӧ сьӧм да тайӧ ёна отсалас сӧвмӧдны республикаын сикт-грезд.