Выльторъяс

Коми Каналан Сӧветын «гӧгрӧс пызан» дырйи вӧзйисны пыртны вӧр участок субаренда вылӧ кутӧд

Кӧч тӧлысь 26 лунӧ Коми Республикаса Каналан Сӧветын «гӧгрӧс пызан» дырйи видлалісны вӧр заптан юкӧнын кӧртымалӧм. Сэні участвуйтісны дінмуса парламентлӧн депутатъяс, олӧмӧ пӧртысь власьт органъясӧс, вӧр промышленнӧй предприятиеясӧс, муниципальнӧй юкӧнъясӧс да ӧтйӧза котыръясӧс петкӧдлысьяс.

Кыдзи пасйис парламентса вӧр-ва озырлун, вӧр-ваӧн вӧдитчан да экология комитетӧн веськӧдлысь Василий Смалий, республикаын вӧр заптӧм вӧрӧн вӧдитчӧмын медшӧр туйвизь да сылӧн экономика зэв ыджыд  тӧдчанлун. Но кӧртымалӧмыс тані абу ӧткодь.

«Талун канму тшӧктӧ вӧрсӧ пыдіа переработайтны. Гырысь арендаторъяс босьтӧны ас проектъяс збыльмӧдӧм вылӧ ыджыд площадьяс, налы отсасьӧ канму. Но колӧ отсавны ичӧт да шӧр бизнеслы, ӧд абу гусятор, мый вӧр посёлокын олысьяслӧн удждоныс йитчӧма вӧр заптӧмкӧд. Тайӧ да мукӧд юалӧмсӧ талун видлалӧны оланпас пыртан тшупӧдын», – пасйис Василий Смалий.

Коми вӧр-ва озырлун да гӧгӧртас видзан министр Роман Полшведкин серти, республикаын ӧтувъя арталан лесосекаыс 33,4 млн. кубометр – тайӧ Рытыв-Войвыв федеральнӧй кытшса лесосекалӧн 26%-ыс. Но бӧръя куим воын чиніс вӧр участок кӧртымалан сёрнитчӧмъяс кырымалӧм вылӧ инӧд вузалӧм кузя аукцион лыдыс. Тайӧ йитчӧма Россия Федерацияса вӧр кодексӧ вежсьӧмъяс пыртӧмкӧд да выль экономика боксянь бур вӧр участокъяс абутӧмкӧд.

Кӧртымалан участокъяс вылын вӧрӧн вӧдитчӧмын мытшӧдъяс пиын ӧти сійӧ, мый вӧрӧн вӧдитчысьяс оз вермыны нюжӧдны кӧртымалан сёрнитчӧмъяс. Колӧ кутчысьны кык медшӧр корӧмӧ: медым эз вӧв торкӧма кӧртымалан сёрнитчӧмлӧн корӧмъяс, а кӧртымавны колӧ 10 воысь оз этшаджык. Збыль вылас артмӧ сідз, мый пӧшти быд арендаторӧс кыскывлісны административнӧй кывкутӧмӧ.

Мытшӧд разьӧм понда дінмуса министерство вӧзйӧ вежны видзӧдлассӧ да тӧд вылӧ босьтны сӧмын кӧртымалӧмысь да вӧр видзан, доръян да быдтан уджъяс вӧчтӧмысь уджйӧз.

Кыдзи висьталіс чукӧртчысьяслы «Луздор» МР МЮ-са администрациялӧн экономика сӧвмӧдан юкӧнса начальник Мария Чукилева, аукцион системаыс сетӧ позянлун быд юридическӧй кывкутысьлы либӧ ас вылӧ уджалысьлы кӧртымавны вӧр участок Сідз, Луздор районын унджыкыс уджалӧны Киров обласьтса предприятиеяс. Найӧ вӧдитчӧны вӧрӧн да инфраструктураӧн, но оз могмӧдны меставывса олысьясӧс уджалан местаясӧн, оз мынтыны районса сьӧмкудйӧ вотъяс, жуглӧны туйяс. Серпассӧ позьӧ вежны конкурс системаӧ вуджӧмӧн.

Нӧшта заседание вылын пасйисны, мый Комиын медбур вӧр участокъясыс   перекупщикъяс дорын. Найӧ сетӧны вӧр участокъяссӧ субарендаӧ кык пӧв донаджыкӧн.

Медым корсьны петан туйяс, участникъяс вӧзйисны дінмуса вӧр-ва озырлун да гӧгӧртас видзан министерстволы дасьтыны вӧзйӧмъяс да шыӧдчыны Россия Федерацияса Канму Дума дорӧ вӧр участокъяс субаренда вылӧ кутӧд пыртӧм йылысь оланпас пыртан водзмӧстчӧмӧн.

Фотоыс «Комиинформ» ЮА-лӧн