2019 вося урасьӧм тӧлысь 17 лунӧкутасны пасйыны республикаса медшӧр оланпаслысь юбилей. Каналан Сӧветын лӧсьӧдісны ведомствокостса уджалан котыр, коді кутас дасьтыны тайӧ кадпаслы сиӧм мероприятиеяс. Сэтчӧ пырисны депутатъяс, оломӧ пӧртысь власьт органъясӧс, КР Юралысьлысь Администрацияӧс, велӧдан учреждениеясӧс петкӧдлысьяс. Уджалан котырнас юрнуӧдӧ Коми Республикаса Каналан Сӧветӧн Веськӧдлысь Надежда Дорофеева.

Юбилейнӧй мероприятиеяс кутасны мунны 2019 во чӧж. Сідз, урасьӧм тӧлысьын мунасны «Коми Республикаса Оланподувлы 25 во: история да ӧніъялун» парламентса кывзысьӧмъяс. КР Национальнӧй библиотекаын дасьтасны «Оланподув. Коми Республикаса медшӧр документ» небӧгъяслысь выставка, нуӧдасны республикаса канйӧзкӧд паныдасьлӧмъяс. Та кындзи, библиотекаын мунас «Оланподув лун» квест-ворсӧм. Том йӧзлы юношескӧй библиотека дасьтіс «Оланподув – оланпас, мый серти ми ставӧн олам» юӧр лун, а Л. Брайль нима синтӧмаяслы библиотека дасьтас КР бӧрйысян комиссияӧ пырысьяскӧд паныдасьлӧм.

Муниципалитетъясын петкӧдласны национальнӧй кино,  КР Национальнӧй музейӧ локтысьяс вӧласны «Канмулӧн медшӧр оланпас» экскурсия вылын.

Питирим Сорокин нима Сыктывкарса канму университетын мунас тоится «Коми Республикаса Оланподув: дасьтӧмлун да олӧмӧ пӧртӧмлӧн аслыспӧлӧслун» восьса лекция-презентация. Оланподувлы 25 во тырӧмлы сиасны «VII Юридическӧй лыддьысьӧмъяс» ставроссияса наука конференция.

Оланподувлысь положениеяссӧ кутасны видлавны гырысь классъясын велӧдчысьяс да студентъяс парламентса урок вылын, кутшӧмӧс кӧч тӧлысьын нуӧдасны Коми Каналан Сӧветлӧн депутатъяс. Челядьлы дасьтасны «Ме серпасала ассьым инӧдъяс» серпасасян конкурс.

Оланподувлӧн история йылысь тӧдмӧдӧ Каналан Сӧветын меститчӧм «Ревкомсянь Каналан Сӧветӧдз» пыр уджалысь выставка. Та кындзи, кӧсйӧны йӧзӧдны 1994  воын вынсьӧдӧм Коми Республикаса Оланподувлы сиӧм документъяс да материалъяс.

Нӧшта казьтыштам, мый Коми парламентлӧн официальнӧй сайт вылын индӧма «Республикалӧн Оланподувъяс» (Коми АССР-са да Коми Республикаса Оланподувъяслӧн текстъяс чукӧр (1937 – 2003) небӧглысь электроннӧй версия. Быд текст дорӧ вайӧдӧма гӧгӧрвоӧдӧмъяс, мый отсалӧны гӧгӧрвоны Оланподув (либӧ сылысь редакция) вынсьӧдӧмлысь помкаяс, история да политика боксянь условиеяс.