Максаковкаысь ӧтка олысь пенсионерка Светлана Ивановна Ионас паныдаліс виччысьтӧм йӧзӧс, кодъяс пиын вӧлі дінмуса парламентлӧн спикер Надежда Дорофеева. Кӧкъямысдас арӧса ань дыр уджаліс 15 №-а шӧр школаын ичӧт класса челядьӧс велӧдысьӧн. Уна во сайын сійӧ колис ӧтнас да олӧ важ керкаын. Неыджыд пенсиясӧ ветеран видзӧдӧ пес вылӧ, запасыс бырис тайӧ вежонын.

Шог йылысь тӧдмалісны «Добрые Сердца» бурвӧчан проектысь волонтеръяс, кодъяс кутісны чукӧртны сьӧм нималана велӧдысьлы пес вылӧ. Небыд сьӧлӧма йӧз юксисны сьӧмӧн. Неважӧн дінмуса парламентарийяс юӧртісны «Геройяс орччӧн олӧны» проект йылысь.

«Проектлӧн могыс отсавны пикӧ воӧм йӧзлы, а Светлана Ивановна Ионас – нималана морт. Сылӧн историяыс вӧрзьӧдіс сьӧлӧмӧс да шуи сылы ньӧбны машина пес. Шыӧдчи «Тепло севера» ИКК дорӧ, кодъяс заптӧны да вузалӧны чорыд ломтас. Предприятиеса веськӧдлысь Дмитрий Годяцкий кор тӧдмаліс могсӧ вӧзйис дон босьттӧг отсӧг», - висьталіс Надежда Дорофеева.

Колян пекничаӧ пессӧ вайисны Светлана Ивановналы да парламентса спикер «Доброе сердце» юрнуӧдысь  Евгения Ефимовакӧд, «Молодая гвардияын» водзмӧстчысьяскӧд  да посёлокса школаын велӧдчысьяскӧд тэчисны пес чипас.

Кыдзи висьталіс парламентарий, ӧтвылысь разисны мукӧд мытшӧд. Ньӧбисны сарай вевт вылӧ рубероид, а Максаковка администрацияӧн веськӧдлысьӧс вежысь Анатолий Меркурьев вайӧдіс дӧскаяс да корис кык уджалысьӧс, кодъяс дзоньталісны вевтсӧ. Меставывса веськодлан компанияысь специалистъяс локтасны Светлана Ивановна дорӧ локтан вежонын  да лӧсьӧдасны кильчӧсӧ.

«Ми ставӧн шуим отсавны Светлана Ивановналы. Ми эгӧ корсьӧй мыжаясӧс, а вӧчим колана удж. Светлана Ивановна корӧм серти кӧсъя сьӧлӧмсянь аттьӧавны став участникӧс. А ассянь содта, мый нималан велӧдысь оз вермы овны татшӧм условиеясын. Выльлунӧ шыӧдча  Сыктывкарса администрацияӧн веськӧдлысь Валерий Козлов дорӧ  консультацияла, кыдзи позяс отсавны Светлана Ивановналы бурмӧдны олан условиеяс», - пасйис Надежда Дорофеева.

Коми Каналан Сӧветӧн Веськӧдлысь сёрнитчис волонтеръяскӧд, мый тайӧ абу бӧръя ӧтувъя удж. «Добрые сердца» некоммерческӧй организацияӧс котыртісны во сайын, водзмӧстчысьяс отсалӧны пикӧ воӧм пенсионеръяслы. Ӧні налӧн 42 тӧждувса морт, кодъяслы быд вежон вайӧны нянь да йӧв, а сідзжӧ социальнӧй уджалысьяслӧн юӧртӧм серти вӧчӧны мукӧд удж.

Миян «Геройяс орччӧн олӧны» проект абу ӧтчыдысь вӧчана акция. Быд  депутат аслас бӧрйысян кытшын пыр вӧчӧ татшӧмсяма удж. Но ӧні ми шуим вӧчны тайӧс ӧтув да кыскыны мукӧдӧс. Эскам, мый республика мутасын проектлы отсаласны, ӧд миян пӧвстын олӧны збыль геройяс, кодъяслы тшӧкыда колӧ отсавны. Ми ӧтув зілям на бӧрся тӧждысьны», - пасйис Надежда Дорофеева.