Косму тӧлысь 29 лунӧ Коми Республикаса Каналан Сӧветлӧн зеседание дырйи депутатъяс вынсьӧдісны оланпасъяс, кутшӧмъяс отсаласны ичӧт да шӧр бизнеслы.

Медводз, сора тӧлысь 1 лунсянь дінмуын лоас «Уджсикас чӧжӧс вылӧ вот» торъя вота режим. Сійӧ сетас позянлун «асьнысӧ уджӧн могмӧдысь» гражданалы оланпасавны ассьыныс уджнысӧ медічӧт рӧскодӧн. Тайӧ онлайн-пасйысьӧм, оз ковмы вӧчны отчет да ньӧбны контрольно-кассӧвӧй техника. Та кындзи, 13% НДФЛ пыдди чӧжӧс босьтігӧн ковмас мынтыны торъя мортлы 4%, юридическӧй кывкутысьлы да ас вылӧ уджалысьлы - 6%.

Пыртісны вежсьӧмъяс «Коми Республика мутасын организацияяслӧн эмбур вылӧ вот йылысь» республиканскӧй оланпасӧ. Найӧ чинтӧны организацияяслы эмбур вылӧ вотсӧ ставкалӧн 1%-ӧдз сэки, кор вот базасӧ урчитӧны вӧрзьӧдны позьтӧм эмбурлӧн кадастр донысь. Тайӧ мераыс паськалӧ дінмуын пасйӧм ичӧт да шӧр бизнеслы.

Кыдзи пасйис Каналан Сӧветӧн Веськӧдлысьӧс вежысь Валентина Жиделева, депутатъяс эскӧны, мый тайӧ оланпасыс ышӧдас асшӧр уджалысьясӧс пасйысьны республикаын.

Нӧшта ӧти оланпас йитчис Коми Республика мутасын кокньӧдӧм воталӧм вӧдитчомкӧд. Тавося тӧвшӧр тӧлысь 1 лунсянь куим во вылӧ кык пӧв чинтасны вот ставкаяссӧ УСН-ӧн вӧдитчысь организацияяслы да ас вылӧ уджалысьяслы.

 «Коронавирус паськалӧкӧд йитӧдын вынсьӧдӧм оланпасъясыс зэв коланаӧсь. Ас вылӧ уджалысьяс виччысисны тайӧ отсӧгсӧ, шыӧдчывлісны депутатъяс дорӧ да исполвласьт органъяс дорӧ», - тӧдчӧдіс Валентина Жиделева.