Выльторъяс

Парламентлӧн вылыс палатаын вӧзйисны содтыны сьӧм сиктъясӧс комплекснӧя сӧвмӧдан уджтас вылӧ

Та йылысь юӧртіс спикер Валентина Матвиенко сиктлӧн социальнӧй юкӧнын уджалысьяскӧд паныдасьӧм дырйи. Мероприятиеыс муніс видеоконференцсвязь пыр, сэні участвуйтіс Коми Каналан Сӧветӧн Веськӧдлысь Сергей Усачёв, дінмулӧн куим профильса министерствоясӧс петкӧдлысьяс.

Федерация Сӧветӧн Юралысь пасйис, мый «Сиктса ипотека» уджтас отсӧгӧн странаын оланінсӧ бурмӧдіс 45 сюрс семья. Но сиктын унджык олысьыс сійӧс оз вермы босьтны. Вылыс палатаын вӧзйисны содтӧд отсавны ас оланін стрӧитігӧн, шуам, пыртны «Сиктса ипотекаӧ» пу керка стрӧитӧм. Вӧзйӧмсӧ ошкис видз-му овмӧс министр Дмитрий Патрушев.

Торйӧн видлалісны сиктъясӧс кадръясӧн могмӧдӧм. Талун сӧвмӧ том уджалысьясӧс сиктӧ кыскан система. Уджалӧны нин «Земскӧй доктор», «Земскӧй фельдшер» да «Земскӧй велӧдысь» уджтасъяс. Федерация Сӧветын лыддьӧны, мый тайӧ уджсӧ паськӧдасны сиктын уджалысь культура да спорт юкӧнын специалистъяс вылӧ.

Пандемия «эрдӧдіс» цифрӧвӧй торъялӧм кузя юалӧмъяс. Коронавирусӧн висигӧн сиктын олысьяслӧн медыджыд мытшӧдъяс артмисны велӧдӧмын да дзоньвидзалун видзӧмын, социальнӧй услугаяс босьтігӧн. Та вӧсна талун федеральнӧй шӧрин зіля разьӧ тайӧ мытшӧдъяссӧ. План серти, таво бур ӧтуввез лоас став олан пунктын, кӧні олӧ 100-ысь унджык морт.

Та кындзи, парламентарийяс корисны зільджыка вӧдитчыны телемедицинаӧн. Дасьтӧмаӧсь нин дзескӧдӧмъяс киритӧм йылысь лӧсялана стӧчмӧдӧмъяс, медым вылыс квалификацияа  медицина отсӧг лоис восьсаӧн став россияналы, олан ин вылӧ видзӧдтӧг.

«Талунъя мероприятиеыс – тайӧ оланпас пыртысьяслӧн сиктса социальнӧй юкӧнын уджалысьяскӧд восьса сёрни. Эска, мый талунъя паныдасьӧм петкӧдліс местаяс вылын серпассӧ, отсаліс гӧгӧрвоны могъяс да мытшӧдъяс, медым лӧсьӧдны колана условиеяс сиктса мутасъяс социальнӧя да экономика боксянь сӧвмӧдӧм могысь» - тӧдчӧдіс Сергей Усачёв.