Выльторъяс

Коми Каналан Сӧветлӧн Президиум видлаліс 2020 воын Видзӧдан-арталан палаталӧн уджлысь кывкӧртӧдъяссӧ

Косму тӧлысь 20 лунӧ Каналан Сӧветса Президиумлӧн заседание вылын Республикаса видзӧдан-арталан палатаӧн веськӧдлысь Игорь Гурьев висьталіс депутатъяслы 2020 воын КСП уджлысь кывкӧртӧдъяс йылысь.

Верктуйнас лоис коронавирус вылӧ сетӧм сьӧм видзӧдӧм бӧрся котроль. Кыдзи пасйис Игорь Гурьев, такӧд йитӧдын планӧ пыртӧма выль мероприятие, коді йитчӧма дінмуса медицина организацияясын уджалысьяслы ышӧдана мынтӧмъяс вылӧ сьӧм видзӧмлысь анализкӧд.

Ставнас 2020 воын Палата нуӧдіс 93 мероприятие: 8 контрольнӧй да 85 экспертно-аналитическӧй. Медбӧръяяслӧн ыджыдджык пайыс йитчома оланпас балаяс экспертизаяскӧд.

Колян воын контроль мероприятиеяс нуӧдісны 23 объект кузя, та дырйи Палата прӧверитіс 9 млрд шайт, на пиын пӧшти 80 прӧчентыс республиканскӧй сьӧмкудйысь сьӧм. Сёрнитысь тӧдчӧдіс, мый мероприятиеяс лыдын прӧверкаяс, кутшӧмъяс йитчӧмаӧсь велӧдан учреждениеяс стрӧитӧмкӧд, карын комфортнӧй олӧм лӧсьӧдӧмкӧд, культура учреждениеяслысь материально-техническӧй база бурмӧдӧмкӧд да с.в.

КСП-лӧн контроль да экспертнӧй мероприятиеяс дырйи эрдӧдісны 300 млн шайт вылӧ 456 торкалӧм.  150 млн шайт вылӧ торкалӧмыс йитчӧма сублизингӧ автобусъяс сетӧм кузя «Комиавтотранс» АК-кӧд сделка кырымалӧмкӧд. Торкалӧмсӧ бырӧдісны. 38 млн шайт вылӧ пасйисны торкалӧмсӧ медучреждениеясын уджалысьяслы ышӧдан мынтӧмъяс сетігӧн. 20 млн шайт- закупкаяс юкӧнын.