Игорь Ковзель чолӧмаліс «Ёж» II войтыркостса экотуристическӧй форумса гӧсьтъясӧс да участникъясӧс

Кӧч тӧлысь 3 лунӧ Сыктывкарын заводитіс уджваны «Ёж» II войтыркостса экотуристическӧй форум. Сійӧ воссис «Торйӧн видзана вӧр-ва мутасъясын туризм сӧвмӧдӧм да вӧр-васа туризмлӧн инфаструктура» конференциясянь, тані мероприятиеса участникъяс да гӧсьтъяс дорӧ шыӧдчис Коми Республикаса Каналан Сӧветӧн Веськӧдлысь Игорь Ковзель.

Сійӧ пасйис, мый депутатъясӧс форумлӧн темаыс ёна ышӧдӧ. «Ми тіянкӧд гӧгӧрвоам, мый оз артмы сӧвмӧдны туризм – экологическӧй либӧ гӧгӧрвоадана - зумыд оланпастэчас подувтӧг. Кӧть и вӧр-ваыс озыр, но колӧ содтӧд сьӧм да стӧч уджалан план, кутшӧмӧс ог вермӧ збыльмӧдны инӧдын паныда видзӧдласъяс понда», – тӧдчӧдіс Игорь Ковзель.

Сы серти, тайӧ серпасыс лӧсялӧ формулӧн медшӧр темалы – торйӧн видзана вӧр-ва мутасъясын туризм сӧвмӧдӧмлы. «Дерт, Коми Республикалы тайӧ зэв тӧдчана туйвизь. Миян му озыр аслыспӧлӧс ресурсъясӧн да уна сикас вӧр-васа объектъясӧн. Озыр культурно-историческӧй вынйӧр кыскас туристъясӧс. Весиг талун, кор ми заводитам уджавны тайӧ туйвизь кузя, гӧгӧрвоам, мый колӧ оланпастэчас боксянь стӧчджыка ладмӧдны торйӧн видзана вӧр-ва мутасъясын туризм лӧсьӧдӧм. Тайӧ йитчӧма татшӧм мутасъяс лӧсьӧдӧмкӧд, найӧс видзӧдӧмкӧд, туризм лӧсьӧдӧм могысь инфраструктура вӧчӧм да уна мукӧдтор», – пасйис Игорь Ковзель.

Коми Каналан Сӧветӧн Веськӧдлысь серти, тайӧ мытшӧдъяссӧ он вермын разьны субъектъяс тшупӧдын. «Татшӧм мутасъясын туризм системнӧя сӧвмӧдӧм могысь колӧ ӧтув уджавны федеральнӧй да дінму тшупӧдъясын. Зэв тӧдчана, мый тайӧ юалӧмсӧ талун бура видлаланныд. Эска, мый видлалӧм да опытӧн юксьӧм бӧрын тайӧ юкӧнын оланпастэчас подув ёнджыка стӧчмас», – кывкӧрталіс Игорь Ковзель да сиис форумса участникъяслы бур удж, ышӧдана вензьӧмъяс да удж кузя выль йитӧдъяс.