Игорь Ковзель участвуйтіс кыпыд чукӧртчылӧмын, кутшӧмӧс сиисны республикаса мусир да биару юкӧнлы 85 во тырӧмлы

Коми Республикаса Каналан Сӧветӧн Веськӧдлысь Игорь Ковзель участвуйтіс кыпыд чукӧртчӧмын, кутшӧмӧс сиисны Коми Республикаса мусир да биару юкӧнлы 85 во тырӧмлы. Мероприятиеыс муніс кӧч тӧлысь 4 лунӧ Ухтаын.
Аслас чолӧмалӧмын Игорь Ковзель тӧдчӧдіс, мый мусир да биару юкӧн медводз лоис зумыд подулӧн, а сэсся ёна сӧвмӧдӧ оз сӧмын Коми Республикалысь экономика, но и став страналысь.
«Дерт, тайӧ артмис мусир да биару перйысьяслӧн быдлунся да сьӧкыд уджысь. Сӧмын зумыдлун да зільӧм отсалӧны тіянлы венны став сьӧкыдлун, сӧвмӧдны юкӧн да лӧсьӧдны войвывса каръяслысь торъялана сям», – висьталіс Каналан Сӧветӧн Веськӧдлысь.
Игорь Ковзель нӧшта пасйис, мый мусир да биару перйысьяс пӧвстын век уна водзмӧстчысь йӧз.
«Тіян юкӧнӧс петкӧдлысьяс вӧліны миян республикаса оланпас пыртан органлӧн быд созывын: Коми АССР-са Медвылыс Сӧветсянь Каналан Сӧветӧдз. Найӧс эз вунӧдны. Иван Ильич Косолапкин - бурӧвӧй мастер, коді локтіс Ухтаӧ медводдза мупытшса озырлун корсян-туялан экспедициякӧд, сэсся лоис Медводдзаысь бӧрйӧм Медвылыс Сӧветса депутатӧн. Легендарнӧй Анна Яковлевна Молий – Ухтаса мусир вийӧдан заводса директор – петкӧдліс мусир перйысьясӧс мӧдысь бӧрйӧм Медвылыс Сӧветын. Найӧ топыда йитчӧмаӧсь карса историякӧд – Иван Косолапкинлысь ним сетӧма уличалы, а Анна Яковлевналы сетӧма Ухтаса почёта гражданинлысь ним», – пасйис Каналан Сӧветӧн Веськӧдлысь да содтіс, мый землякъяслысь паметь видзӧм водзӧ нюжӧдӧ мусир да биару юкӧнӧс петкӧдлысьясӧн панӧм нималана традицияяс.
Сёрни помын Игорь Ковзель сиис мусир да биару предприятиеясын уджалысьяслы да налӧн аскотыръяслы шуд, тыр-бур олӧм, вермӧмъяс.