Кӧч тӧлысь медводдза лунъясӧ Коми Республикаса Каналан Сӧветлӧн депутатъяс кыдзи пыр нуӧдасны республикаса каръяслӧн да районъяслӧн велӧдчан заведениеясса велӧдчысьяслы восьса урокъяс. «Парламентса вежон» заводитчӧ кӧч тӧлысь 1 лунсянь.

Коми Республикаса Каналан Сӧветӧн Веськӧдлысь Игорь Ковзель серти, депутатъяс тӧдмӧдасны гырысь классъясын велӧдчысьясӧс да студентъясӧс  российскӧй парламентаризм сувтан да сӧвман тшупӧдъясӧн, Федеральнӧй Собраниеса палатаяслӧн уджӧн, а сідзжӧ висьталасны республикаса Каналан Сӧвет да сылӧн тэчас йылысь.

«Российскӧй да республикаса парламентъяс йылысь том йӧз унатор тӧдӧны школаса курсысь. Та понда татшӧм форматтӧм депутатъяскӧд паныдасьлӧмъяс дырйи найӧ вермасны йитны теориясӧ практикакӧд, тӧдмавны, кыдзи дасьтӧны оланпасъяс да мыйысь артмӧ депутатлӧн уджыс», – пасйис Игорь Ковзель. 

Нӧшта урокъяс вылын парламентарийяс вӧзъясны челядьлы тӧдмасьны  «Памятуя лишь о благе и пользе России»: представители Коми края в российском парламенте» аслыспӧлӧс небӧгӧн, кутшӧмӧс йӧзӧдісны КР Каналан Сӧветлӧн водзмӧстчӧм серти. Сэні эм странаса медвылыс оланпас пыртан органъясын Коми мусянь став созывса депутатъяс йылысь юӧр. Небӧглы материалсӧ чукӧртісны кык во чӧж быдсикас архивысь, уна документсӧ да фотографиясӧ йӧзӧдісны медводдзаысь.

 Парламентса урокъяссӧ кӧсйӧны нуӧдны кык вежон чӧж. Кӧч тӧлысь 1 лунӧ Коми Республикаса Каналан Сӧветӧн Веськӧдлысь паныдасяс Сыктывкарса  народнӧй дипломатия лицейын велӧдчысьяскӧд. Каналан Сӧветӧн Веськӧдлысьӧс Медводдза вежысь Валерий Марков нуӧдас уроксӧ Коми республиканскӧй физико-математическӧй лицей-интернатын, Веськӧдлысьӧс вежысь Валерий Жилин – Айкатыласа шӧр школаын.

Вӧр-ва озырлун, вӧр-ваӧн вӧдитчан да экология комитетӧн веськӧдлысь  Александр Макаренко паныдасьлас Усогорскса шӧр школалӧн велӧдчысьяскӧд, Социальнӧй политика комитетӧн веськӧдлысь Михаил Брагин ветлас сыктывкарса 4№ да 21№ школаясӧ, Сьӧмкуд, вот да экономическӧй политика комитетӧн веськӧдлысьӧс вежысь Иван Медведев – Кӧрткерӧсса шӧр школаӧ. 

Социальнӧй политика кмитетӧн веськӧдлысьӧс вежысь Людмила Афанасьева нуӧдас восьса урокъяс сыктывкарса челядьлы 3 №-а керкаын, юркарса 16 №-а шӧр школаын да Вузасян да технологическӧй техникумын; Оланпастэчас да меставывса асвеськӧдлӧм кузя комитетӧн веськӧдлысьӧс вежысь Алексей Цыпанов – Койгорт районлӧн Подз посёлокса школаын. 

Сергей Артеев ветлас сыктывкарса 25 № шӧр школаӧ; Владимир Безрук – Усвавом сиктса школаӧ; Николай Бейзак – воркутаса 14 № школаӧ да 3 № гимназияӧ; Виктор Ведрицкас – Печора карса 49 № школаӧ; Владислав Гаврилов –сосногорса 3 № шӧр школаӧ; Геннадий Горбачев – Воркута карса 16 № школаӧ; Юрий Гусев – Сосногорск карса 4 № школаӧ; Сергей Ефанов – Воркута карса 23 № школаӧ да Воркутаса горно-экономическӧй колледжӧ; Белла Забровская – сыктывкарса технологическӧй лицейӧ; Марина Истиховская – Выльгортса шӧр школаӧ да Усинскса школаясӧ ӧти; Светлана Литвина – Сыктывкарса 22 № школаӧ; Евгений Лядов – Г.В. Рассохин нима Ухтаса техническӧй лицейӧ; Петр Оборонков –усинска 35 № школаӧ; Татьяна Саладина –сыктывкарса 12, 24, 35 №№ школаясӧ; Акиф Саядов –Инта карса 5, 8, 10 №№ школаясӧ; Болеслав Скроцкий – Коми Республикаса Юралысь нима искусствояс гимназияӧ.